شكرا لكل الارهابيين

مفيش كلام غير شكرا علي العيديه بس مش بدري شويه السنه دي ؟

مستعجلين تنكدوا علينا للدرجه دي؟

يــــــــــــــــــــــــــــــــاه

ايه كل الكره والغل اللي في قلوبكم من ناحيتنا ده

ليه احنا عملنالكم ايه علشان كل عيد تنكدوا علينا وتقتلوا شبابنا وترملوا وتيتموا اطفالنا

ومش عاجبكم اللي بتعمله اسرائيل مع الفلسطينين !!

يا كفره انتوا اتفوقتوا عنهم في الارهاب والهمجيه والخسه

منكم لله ذنب كل شاب اتقتل واب مات وماتت معاه فرحه أطفاله

في رقبه كل جبان يشوف الظلم ويحيد عنه

اللي اتقتلوا انهارده دول شهداء ماتوا بكرامتهم مرفوعين الرأس

لانهم وفي وسط تهديدات سابقه بقتلهم ماخافوش وراحوا لكنيستهم علشان يصلوا

لكن الجبناء هما اللي نفذوا الجريمه دي لانهم وبكل جبن وخسه عملوا عملتهم

وهما متخفيين وقتلوا ناس ابرياء اطفال وسيدات وشباب كل جريمتهم انهم مسيحيين

ممكن نعرف جنسيه ومله الكلاب الارهابيين دول ايه ؟

علشان نعرف مين اللي مصري بجد ومين الخاين وقليل الاصل في وسطينا

والخاين مالهوش مكان بينا وان كان عنده انتماء لاي شيء تاني غير مصـــــــــر

فا مش عاوزينه فيها يغور في داهيه ويسيبنا نعيش بسلام مع البشر اللي من نفس طبيعتنا

مش هاقول كان فين الامن لان الاجابه كلنا عارفينها !!

يارب احنا تعبنا بجد ولو ان اللي حصل انهارده كان متوقع لكن الاحساس بالقهر شيء مرعب مخيف

عاوزين رد سريع وقوي من عندك انت يارب لانك قلت "لي النقمه انا اجازي"

ولاني واثقه فيك لابعد مدي بقولك اتصـــــــــرف وبســــــــــرعه وهات لنا حقنا زي ما اتعودنا منك

لان البشر ماتت ضمايرهم ومفيش عندهم عدل او رحمه ؛؛؛؛؛؛؛؛؛

يا إلهـي

أحـتاج إليك و أجـــري عليك ...... وتحميـني

وأشبع أمـان وانا بين إيـديك ...... مخبيـــني

ولو مشيت في وسط موج تبقي رجايا ومنقذي

ولو بحور الدنيا هاجت علي شراعي ومركبي

هافضل معاك... ياملجأي

انعدام الضمير

بالصور.. تفاصيل انهيار مئذنة مسجد "ميت العز" بالدقهلية.. طولها 56 مترا وتسببت فى مصرع مواطن وإصابة 4.. وحطمت 4 منازل و3 محلات

العنوان لوحده كفايه هي فعلا كارثه بكل المقاييس

قله الضمير حتي في بناء دار العباده

انا حزينه ومش عارفه دم اللي مات واللي اتصابوا

في رقبه مين بالظبط

هل يعقل بناء مئذنه بارتفاع 56 متر بدون حديد تسليح

وفي ارض تعتبر زراعيه لا تتحمل كل الارتفاع ده

ولا الموضوع منظره والسلام ومش مهم حياه الناس

دي مبنيه مابقالهاش شهرين يا عالم هي ايه بسكويت؟

وكمان بفلوس تبرعات الناس الغلابه

فين مسئول الحي وفين المحافظ وسكرتيره والمهندسين

اللي ادوا تصاريح بالبناء ولا مفيش ترخيص من الاساس؟!!

للدرجه دي الضماير انعدمت من عند البشر

اتمني محاسبه كل المسئولين عن المهزله دي

ربنا يرحم المتوفي ويصبر اهله

وتمنياتي بالشفاء العاجل لكل اخواتنا المصابين

ويارب تكون اخر الاحزان لشعبنا المغلوب علي امره

لك الله يا مصر

نكتفي بهذا القدر من االارهاب والهمجيه!!!

لقد طفح بنا الكيل ,,,,

وعلي كل من تسبب في المجازر البشعه ضد الاقباط ان يتحملوا مسئولياتهم امام الشعب والمجتمع الدولي

مايحدث للاقباط في بلدهم مصر هو ضد مبدأ المواطنه الذي يتشدقون به بل ضد ابسط حقوق الانسان بل والحيوان

الساكت علي الظلم هو شيــــــــطان أخـــــــرس

اين الجناح الاخر للأمه من ما يحدث لنا ؟

اين موقف المثقفين من مايحدث لاضطهاد الاقليات في مصر ؟

اين ضمائر المصريين؟هل ذهبت مع الريح ام في اجازه طالما المجني عليه "نصراني"؟

ما مصلحه الاعلام المصري والعربي في الكذب والتدليس المتعمد لقلب الحقائق و جعل الجاني بريء والمجني عليه متهم ؟

لابد من وضع حد ونهايه لهذه المسرحيه الهزليه والتي ابطالها مجموعه من المرتزقه من ماصي دماء الشعب المقهور

لابد ان يخرج كل فئات الشعب المصري يدا واحده ليتظاهر ضد تدخل الامن في مثل هذه المواقف و نطالب من يتاجرون

بدماء ابنائنا ان يرحلوا عنا ويتركونا نعيش في سلام كما كنا في السابق مصريين وفقط لا فرق بين مسلم ومسيحي

ماحدث هو جريمه بكل المقاييس يعاقب عليها في الدول الكافره والتي لا يمتهن فيها كرامه الانسان

لابد ان يعلموا جميعا ان دموع ودم المصري غاليه جدا علي قلوب كل المصريين

ماحدث هو تأكيد علي كل ماجاء في التقرير السنوي للحريات الدينيه والتي اتهمت مصر فيه بالتمييز ضد الاقليات

مسيحيه وشيعيه وبهائيين وادينت باستخدامها العنف ضد المتظاهرين المصريين وايضا المماطله في اصدار الاحكام

لمعاقبه المتهمين في قضايا قتل او عنف ضد الاقباط مثل مذبحه الكشح ومذبحه نجع حمادي ووقوف الامن حامي الديار

مكتوف الايدي اخذاً موقف المتفرج علي ما يحدث من حرق ونهب وسرقه للممتلكات القبطيه .

سكوت القبطي ليس خوفا .بل محبه وتسامح منه تطبيقا لتعاليم دينه

وايضا حفاظا منه علي أمن بلاده من ان يكون سبب لزريعه تدخل اجنبي في بلاده

وليفهم الجميع ان مسيحيي الشرق هم صمــــام الامان لهذه المنطقه

وعلي هذا الاساس يجب التعامل معهم ؛

اعتذر عن شده اللهجه ولكن ليعزرني الجميع ففي قلبي جرح غائر لا يداويه الزمن .

لك الله يا مصــرنا الحبيبه ؛؛؛

مش عارفه هي امي ..ولا مرات ابويا !!!

اللي يشوف اللي بيحصل في مصر يقول ان مصر دي مش ام لاولادها انما دي مرات ابوهم


وده حقيقي لما نتأمل اللي بيحصل مع الاقباط كل يوم نلاقي انهم محسوبين
علي مصر ع الفاضي يعني الاسم
مصريين لكن ما عندهمش أماره انهم مصريين يعني لما اقول انا مصري وبلا فخر
طيب باماره ايه ال بلا فخر دي ؟
اذا كنت بتعامل علي اساس اني مواطن درجه عاشره في كل حاجه وكاني نازل علي البلد
من المريخ وكانها مش بلدي وبلد أجدادي لما بتأمل حال المهاجرين للدول
المحترمه اسفه قصدي الكافره بلاقيهم واخدين حقهم غصب عن عين اصحاب الدول وبيستغلوا مفهوم الحريه عند بلاد الكفر وبيطالبوا بكل بجاحه باللي مايقدروش يطالبوا بيه في بلادهم الاصليه .لكن لما بقارن بين حالي انا المصري القبطي في بلدي وحال الغريب في بلد محترمه بتحترم ابسط قواعد الانسانيه بتعب جدا وبلاقي ان الحيوان في اي بلد غربي له حقوق و قيمه اكتر من البني ادميين في بلادنا ان التعامل مع المواطن بيكون
بطريقه متدنيه جدا لدرجه ان الامن اللي مفروض يكون واجبه حمايه المواطن اتحول لبعبع
اي حد هايعترض او هايحتج او مش هايعجيه الحال الامن موجود وكان شغلته ارهاب
وترويع المواطن طبعا ده استحاله يحصل في اي دوله فيها بني ادميين بجد ولكن لاننا
مش بني ادمين بجد فا حللوا لنفسهم يقتلوا المواطن ويسحلوه وطبعا المبررات والتهم جاهزه و
موجوده زي ماحصل مع الشاب المصري خالد سعيد لما فكر بس انه يعترض علي معامله رجال
الامن له واهانتهم لابسط حقوقه كانسان اولا وكمواطن مصري له حقوق طبعا خلوه عبره لمن لا يعتبر علشان
اللي يفكر يعترض يبقي عارف هو رايح علي فين وده اللي حصل مع اقباط كنيسه العمرانيه لما فكروا يحتجوا علي التعسف
في بناء كنيسه او مبني خدمات ايا كان ايه هو اساس الموضوع من امتي بنشوف الامن المصري بينزل للشارع بالالاف
كانه في حاله حرب؟ دا علي الحدود دخلوا علينا و قتلواا اولادنا من جنود وظباط وشتمونا واتهمونا بالعملاء لاسرائيل
مافيش رصاصه واحده انضربت من جيشنا المصري علي اللي كسروا الحدود !! هو بناء كنيسه دلوقتي بقي اخطر
من كسر حدود دوله لها مكانتها زي مصر!!!
ثم ماشوفناش ان الامن نزل الشارع علشان يمنع متظاهرين الجمعه من سب واهانه البابا شنوده وهو رمز ديني
وماشوفناهمش نزلوا علشان يمنعوا حرق بيوت ومحلات المسيحيين في قنا او فرشوط او نجع حمادي او او او
ماينفعش بأي حال من الاحوال ان يتم التعامل مع المسيحي وكانه جربه!!
مش هاقول غريب لان الغريب بيجي يضربنا في بلدنا وبنقوله شكرا ابقي تعالي تاني .. ليه كده
فين الحريه في بناء دور العباده ؟؟ مش مكسوفين ان الكفره بيسمحوا ببناء مساجد في بلادهم عملا
بمبدا الحريه واحترام البشر والمصري مش عارف يبني كنيسه في بلده؟ ولا حتي يرمم فيها حيطه او سور؟
اي عقل او منطق او دين يقول كده
ده ظلم بين وافتراء و للاسف مفيش عدل ولا ضمير لانه لو فيه عدل وضمير كان يتم التعامل مع
كل المصريين معامله واحده يعني زي ما اخويا المسلم عنده الحق يبني مسجد في اي وقت ويقدر يفرد سجادته ويصلي في اي
مكان البديهــي يكون لي نفـــــس الحقوق والواجبات كمصـــــري.
اقدر ابني كنيسه اصلي فيها في اي وقت واي مكان من غير ما حد يضايق حريتي والا فان الدوله تبقي بتفرق بين المصريين
وبعضهم علي اساس الدين وده ضد مباديء وثيقه حقوق الانسان اللي مصر موقعه علي بنودها
الهياج اللي حصل ده سببه الاساسي هو اصرار الدوله علي التعسف مع الاقباط سواء في قضايا كانوا فيها ضحايا
فا لم يتم الحكم فيها لصالحهم او المماطله في اصدار قانون بناء دور العباده الموحد المودع ادراج مجلس الشعب من عشرات
السنين في حين بيتم تمرير قوانين باكملها في ساعات وكتير من الاحيان بتكون في ضد مصلحه المواطن المصري ولكن لشيء
في نفس يعقوب بتمرر القوانين دي .في النهايه عاوزه اقول للمسئولين اتقوا ربكم في الشعب
الاحساس بالظلم شيء مدمـر للانسان ومن ثم الوطن.
تقبلوا تحياتي؛؛؛؛؛؛؛؛

اي شـرف واي جهاد

الشيخ في الفيديو ده بيقول :

"لا شك تعلق النفس بالجهاد في سبيل الله .ورغبه النفس في سفـك هـذا الـدم و سحـق الجمـاجـم و تقطـيع الاجـزاء في سبيل الله جل وعـلا ودفاعا عن دينه .لا شـك أنه شـرف للمؤمـن "

وانا برضه بقول :

مفيش اي انسـانيه في سفك الدماء

ولا اي شـــرف في سـحق الجماجم

ولا اي رجولـه في تقطـيع الاجـزاء

ولا اتخيل ان فيه حتي إله ولو كان صنم يستمتع بانه يشوف دم واشلاء وجماجم البشر اللي خلقهم

في رايي ان الكلام اللي بيقوله الشيخ كلام خطير جدا ومحتاج لوقفه من منظمات حقوق الانسان و من المفكرين

وعلماء الدين الافاضل من الازهر الشريف .

أمريكا ليست وصياً على الحريات الدينية

تحت العنوان ده قريت خبر علي موقع سي ان ان العربي بإن مصر اعترضت واحتجت كالعاده علي تقرير الامم المتحده للحريات الدينيه وقالت ان واشنطن بتتصرف كوصي وده مش مفروض يحصل ومرفوض من حيث المبدأ .وكمان جه في الخبر ان المتحدث الرسمي باسم الخارجيه المصريه شدد على أن مصر معنية فقط بما يصدر عن الجهات والأجهزة التابعة للأمم المتحدة في هذا المجال، وهى التي تراجع تنفيذ أي دولة لالتزاماتها في مجال القانون الدولي لحقوق الإنسان.وأضاف: "من هذا المنطلق، فإن مصر تؤكد علي رفضها قيام أي دولة بتنصيب نفسها وصياً على أداء دول مستقلة ذات سيادة، دون مرجعية أو سند"، مشدداً علي أن "كل دولة هي أقدر على تفهم مشكلاتها وتحدياتها، والتعامل معها بفاعلية"،وأعرب المتحدث عن الأسف لأن هذه التقارير تقدم، من حيث المضمون، "صورة ((غير متوازنة)) عن أوضاع الحريات الدينية في مصر!! اتساقاً مع ميلها للاعتماد على مصادر مستقاة إما من تقارير إعلامية منحازة، أو من مصادر غير حكومية، تعوزها المصداقية يُذكر أن التقرير السنوي للحريات الدينية، الذي أصدرته الخارجية الأمريكية الأربعاء الماضي، اتهم مصر باتباع "التمييز" ضد بعض الأقليات الدينية، ومنها الأقباط والبهائيين، كما أشار إلى تعرض أعضاء بجماعة "الإخوان المسلمون"، لما وصفها بـ"حملات اعتقال تعسفية."

وقبل ما حد يفهمني غلط انا طبعا ضد تدخل اي بلد في شؤننا كمصريين وضد اي وصايه علي مصر الحبيبه من الخارج ولكن !!

ليه الحكومه ماتاخدش التقرير ده بعين الاهتمام وتدرسه وتشوف ايجابياته وسلبياته وايه اللي ممكن تعمله علشان ما تديش فرصه لاي حد انه يتدخل في شؤننا يعني التقرير بيقول ان فيه اضطهاد واضح للاقليات سواء اقباط او شيعه او بهائيين وده بصراحه حاجه مش بيختلف عليها اي اتنين عندهم نظر ليه بقي الدوله ماتحاولش هي كمان تشوف البلد بعيون محايده لو حصل ده هايتغير حاجات كتيره في البلد ووضع المصريين كلهم هايكون افضل لما يكون مفيش تمييز بين المصري واخوه ويكون التعامل مع المصريين علي اساس انتمائهم لمصر مش علي اساس انهم مسلمين او بهائيين او مسيحيين او او ويكون في عدل في توزيع الوظائف وعدل في بناء دور العباده ويكون في حريه للناس انهم يحتجوا او يتظاهروا علي اي وضع مش عاجبهم ولكن بطريقه حضاريه اعتقد حال بلدنا هايكون افضل من اننا نرفض ونشجب اي انتقاد متوجهه لينا وندفن راسنا في الرمل .الانسان الواعي اللي بيلتفت لاخطائه وتعليقات الناس عليه وبيحاول يصلح من نفسه مش اللي بيفضل شايف نفسه احسن واحد وهو ممكن يكون الاحسن فعلا.. لكن للاسف.. احسن الوحشين