سامحوني بقالي فتره ادخل علي المدونه علشان اكتب وبعدين اقعد متنحه شويه واقفل تاني
مش عارفه اكتب عن ايه ولا اقول ايه ..
بصراحه الكلام اللي عندي كله خلص
وقلبي وجعني من كتر الاحداث اللي بنشوفها واللي بنعيشها
واحساس القلق علي مصر بلدي ومعاها المصريين مش عايز يفارقني ابداً ..
انهارده قررت اخرج عن حاله الصمت دي واتكلم وبصراحه كماااان
قبل ما اتكلم واقول اللي في نفسي اتمني ان المتلقي يحط نفسه مكاني الاول علشان يقدر يفهمني ..
مش بس يفهمني لكن يحس باللي انا حاساه ..
بصراحه كده انا عندي احساس بالقهر وكمان اوقات بحس اني بكره البلد دي ومش عايزاها من الاساس
لا انا لسه بعقلي ما تقلقوش .دي مصر حبيبتي مهما عملت فيا .بس بجد انا بفكر اشوف لي بلد تانيه
بلد فيها بني ادمين بحقيقي يحترموني كانسان اولا وكانثي ثانياً
خلينا في الانسانيه اللي بقت معدومه عند اغلب المصريين ولسبب غير معلوم بالنسبه لي صراحهً
يعني مش لاقيه سبب مقنع لكميه الغـل والوحشيه والغباء والجهل والتطرف واالارهاب والكراهيه و
التعصب وعدم احترام الكبيروانعدام الضمير اللي بقت سمه من سمات الناس عندنا .
وبسأل نفسي اومال لو كنا من الدول اللي مش بتدعي الايمان والتدين والتقوي كان حالنا بقي عامل ازاااااااي ؟
اكيد افضل ..طالما ان التدين عندنا اصبح شكلي ومش ليه اي اهميه ولا تأثير علي سلوكيات البشر
طيب ما قلـته احسن يا جماعه؟ ؟!!
تعالوا نشوف المحترم ده بيقول ايه وبيتكلم باي طريقه ونحدد هل فعلا ده اسلوب شخص سمع عن اي دين من الاساس ولا ؟
الاخ ده بيقول علي البابا المعظم الانبا شنوده الثالث بابا الاسكندريه وبطريرك الكرازه المرقسيه
"النجس شنوده ".. ونعم احترام الاكبر سنا
طيب يا متدين يا مدعي السلفيه لما البابا شنوده اللي هو رمز مشرف لكل المصريين واللي بيقول مصر وطن يعيش فينا يبقي قذر .
اومال انت يا ابو لسان طويل ووش عليه غضب ربنا تبقي ايه؟
ثم الارهابي ده بيقول ان ضرب النار كله جاي من عند الكـــــــــلاب النصاري !!
كلاب ؟ احنا كلاب ؟
علي العموم ومالوا .. الكلاب وفـيه والخــــيانه مش من طبعهم
الكلاب النصاري هم اجدادك اصل البلد اللي انت عايش تخرب فيها والكلاب ولائهم الاول لبلدهم مصــــــــــر مش زييك ولائك للبترودولار
الكلاب النصاري الههم بيقولهم احبوا اعدائكم ..باركوا لاعنيكم احسنوا الي مبغضيكم
ما قالهمش اشتموا علي الخلق ولا احتقروهم ولا اتهموهم بالكدب ولا فجروهم ولا قطعوا ودانهم ولا احرقوا قلبهم كل عيد واحرقولهم كنايسهم ..
افتخر باني كلبه مسيحيه ...ولا ان يجمعني بأمثالك اي دين يا عديم الدين والضمير
بتقول مانبقاش رجاله لو ماحرقناش كل كنايس امبابه؟ لا فعلا راجل
ونعم التحضر
ونعم احترام دور العباده ي
ونعم احترام مشاعر الاخرين
وحقك تعمل اكتر من كده كمان
ومش تحرق كل كنايس امبابه بس ..لأ لألألألألألألألألألأ
دا انت حقك كمان تولع في كل المسيحيين
علشان العالم كله يعرف فكرك المختل
ونفسيتك المريضه
وحقدك الاعمي
وكراهيتك وسواد قلبك
يا عدو نفسك
ربنا يرحمنا من امثالك ويبعد عننا وعن بلدنا كل شر
ويفشل مؤامراتكم الخبيثه لتدمير هذا البلد ..
مصر لكل المصريين مسلمين مسيحيين بهائيين يهود وملحدين وعلمانين وليبراليين ولا دينيين وشيعه ..مش بارادتك يا ارهابي
لكن غصب عنــك ..
