تحت العنوان ده قريت خبر علي موقع سي ان ان العربي بإن مصر اعترضت واحتجت كالعاده علي تقرير الامم المتحده للحريات الدينيه وقالت ان واشنطن بتتصرف كوصي وده مش مفروض يحصل ومرفوض من حيث المبدأ .وكمان جه في الخبر ان المتحدث الرسمي باسم الخارجيه المصريه شدد على أن مصر معنية فقط بما يصدر عن الجهات والأجهزة التابعة للأمم المتحدة في هذا المجال، وهى التي تراجع تنفيذ أي دولة لالتزاماتها في مجال القانون الدولي لحقوق الإنسان.وأضاف: "من هذا المنطلق، فإن مصر تؤكد علي رفضها قيام أي دولة بتنصيب نفسها وصياً على أداء دول مستقلة ذات سيادة، دون مرجعية أو سند"، مشدداً علي أن "كل دولة هي أقدر على تفهم مشكلاتها وتحدياتها، والتعامل معها بفاعلية"،وأعرب المتحدث عن الأسف لأن هذه التقارير تقدم، من حيث المضمون، "صورة ((غير متوازنة)) عن أوضاع الحريات الدينية في مصر!! اتساقاً مع ميلها للاعتماد على مصادر مستقاة إما من تقارير إعلامية منحازة، أو من مصادر غير حكومية، تعوزها المصداقية يُذكر أن التقرير السنوي للحريات الدينية، الذي أصدرته الخارجية الأمريكية الأربعاء الماضي، اتهم مصر باتباع "التمييز" ضد بعض الأقليات الدينية، ومنها الأقباط والبهائيين، كما أشار إلى تعرض أعضاء بجماعة "الإخوان المسلمون"، لما وصفها بـ"حملات اعتقال تعسفية."
وقبل ما حد يفهمني غلط انا طبعا ضد تدخل اي بلد في شؤننا كمصريين وضد اي وصايه علي مصر الحبيبه من الخارج ولكن !!
ليه الحكومه ماتاخدش التقرير ده بعين الاهتمام وتدرسه وتشوف ايجابياته وسلبياته وايه اللي ممكن تعمله علشان ما تديش فرصه لاي حد انه يتدخل في شؤننا يعني التقرير بيقول ان فيه اضطهاد واضح للاقليات سواء اقباط او شيعه او بهائيين وده بصراحه حاجه مش بيختلف عليها اي اتنين عندهم نظر ليه بقي الدوله ماتحاولش هي كمان تشوف البلد بعيون محايده لو حصل ده هايتغير حاجات كتيره في البلد ووضع المصريين كلهم هايكون افضل لما يكون مفيش تمييز بين المصري واخوه ويكون التعامل مع المصريين علي اساس انتمائهم لمصر مش علي اساس انهم مسلمين او بهائيين او مسيحيين او او ويكون في عدل في توزيع الوظائف وعدل في بناء دور العباده ويكون في حريه للناس انهم يحتجوا او يتظاهروا علي اي وضع مش عاجبهم ولكن بطريقه حضاريه اعتقد حال بلدنا هايكون افضل من اننا نرفض ونشجب اي انتقاد متوجهه لينا وندفن راسنا في الرمل .الانسان الواعي اللي بيلتفت لاخطائه وتعليقات الناس عليه وبيحاول يصلح من نفسه مش اللي بيفضل شايف نفسه احسن واحد وهو ممكن يكون الاحسن فعلا.. لكن للاسف.. احسن الوحشين
هناك 6 تعليقات:
اولا اسم المدونة الله محبة احلى اسم قريتة بجد الكلمة دى عزيزة على قلبى جدا
كلماتك عن وصاية امريكا و الله الواقع بيثبت ان امريكا اصبحت وصية على العالم و ليست على مصر فقط عارفة التيمة الامريكية سهلة جدا لو كنا دولة قوية او محترمة او بتحترم مواطنيها مكنش الامريكان ادخلوا :) لكن الامريكى بطبعه ديناميكى و بيحب يشوف مصلحتة على المدى البعيد عموما مقدرش الوم الامريكان اذا كان فى تدخلهم محاولة افاقة الحكومة من غيبوبتها بانها الافضل او الاحسن او ممثليلها المرددين لشعارات فقط
تحيتى لك :)
منوره مدونتي البسيطه يا كونتكا
ده اول تعليق عندي وهايكون ليه ذكري خاصه انا معاكي ان لو في النقد ده مصلحه لينا باننا نغير من نفسنا فأهلا بيه طالما هايغير من واقعنا للاحسن لكن اعتقد ان عندنا ناس مش عاوزين حال البلد يتحسن ابدا وبالتالي فأنتقادات الاخر لينا مش هاتنتهي!!
لك اجمل تحيه
اولا مبروك على المدونة
واسمها طبعا جميل جدا
خبر بقى ان مصر ترفض وتستنكر التدخل الخارجى فى احواها بقت قصة ماسخة وبايخة وملهاش حل
قبل ما نستنكر ونرفض ونشجب نبص لنفسنا ونشوف ماشيين صح ولا غلط
لكن مين وازاى تلاقى ده ؟
نورتي المدونه يافينوس والله يبارك فيكي المدونه بقالها فتره لكن ده كان اول بوست ليا فيها والبركه فيكم طبعا شجعتوني اني اقول رأيي
اما بخصوص موضوعنا فمعاكي حق هي بقت ماسخه وبايخه فعلا وخصوصا انهم بدل ما يعترفوا بأخطائهم في حق الشعب المسكين بكل فئاته لأ دول بيشجبوا وبيستنكروا حاجات موجوده فعلا وماحدش يقدر ينكرها
تحياتي
مبدئيا دا اول تواجد ليا داخل المدونة ، تمنياتي بالتوفيق والنجاح ..
//
"بخصوص فرض الوصايات وما إلى غير ذلك من الكلام اللي لا يودي ولا يجيب - كلام ناس معروفة - "
دعينا نقف على نقطة ، هي كوننا لا نريد أن يوجهنا أحد لما فيه الصواب !!!
هذا مبدئيا ، بخصوص حرية الديانات ، ما اعلمه أن كل فرد حر تماما في اختيار ما يريده دون فرض وصايات ولا توجد ديانة تفرض وصايات ولكن هناك بشر يؤلفون كيفما يريدون اتمنى من كل قلبي أن يأخذوا صابونة ويتكلوا من وصايتهم وكلامهم عن أي ديانة وأي ملة وطائفة - هم أصلا كانوا شغالين حلاقين وبقوا بيفتوا في الكلام اللي هم ما يعرفهوش - ..
\\
اتمنى حدوث التغييرات بالفعل ولكن لا اريدها ان تحدث من قبل الولايات المتحدة او اي دولة أخرى ليس لكوني مناصرا لمن يقولوا هذا ولكن لكوني على يقين شديد أن التغيير لا يأتي إلا من ناس تريد التغيير والأهم تكون قادرة عليه وأهم من ذلك ان يغيروا من أنفسهم الأول قبل أن يغيروا من أمور أخرى ..
//
بونيتا ، الأمر سهل وبسيط إن أرادت دولة أخرى أن تفرض حقوقها علينا ولكن علينا مبدئيا أن نزيل الكره والبغض في نفوس البعض قبل أن نسمح لغيرنا بتغييرنا لسبب بسيط ، قد يعطوا حريات فتزيد الفاجعة بسبب شئ بسيط أن الكره غرس في الأنفس فعلينا ان نصفي الأنفس مبدئيا قبل أن يتم التغيير ..
وتمنياتي بالتوفيق في مدونتك ، وتمنياتي بدوام النجاح ..
تقبلي ردي ومروري ووجهة نظري
IMSA
نورتني بوجودك وانا بتفق معاك جدا ان التغيير لازم يكون من داخل المجتمع نفسه وللاسف عندنا ناس عاجبهم حالهم كده وشايفين انه عادي واننا مش محتاجين للتغيير ودي كارثه ان الانسان يكون مريض وبيقاوح ومش عاوز يعترف بمرضه لان اول طريق للعلاج هو الاعتراف بالمرض والاصرار علي التعافي والشفاء منه
و من التغيير للحريات الدينيه فا ياقلبي لا تحزن فلو نظرنا للاعلان العالمي لحقوق الانسان هانلاقي من اهم بنوده أن لكل شخص الحق في حرية التفكير والضمير والدين، ويشمل هذا الحق حرية تغيير ديانته أو عقيدته، وحرية الإعراب عنهما وطبعا البند ده تحديدا ملغي من قواميس بلادنا فلا حريه تفكير ولا حريه عقيده وبالتالي مفيش حريه ضمير في حين اننا موقعين علي الاعلان ده لكن مفيش تنفيذ وبصراحه مش فاهمه مين له مصلحه في اننا نفضل في التدهور الاخلاقي والحقوقي بالمنظر المخيف ده .
تحياتي لك
إرسال تعليق