اللي يشوف اللي بيحصل في مصر يقول ان مصر دي مش ام لاولادها انما دي مرات ابوهم
وده حقيقي لما نتأمل اللي بيحصل مع الاقباط كل يوم نلاقي انهم محسوبين
علي مصر ع الفاضي يعني الاسم
مصريين لكن ما عندهمش أماره انهم مصريين يعني لما اقول انا مصري وبلا فخر
طيب باماره ايه ال بلا فخر دي ؟
اذا كنت بتعامل علي اساس اني مواطن درجه عاشره في كل حاجه وكاني نازل علي البلد
من المريخ وكانها مش بلدي وبلد أجدادي لما بتأمل حال المهاجرين للدول
المحترمه اسفه قصدي الكافره بلاقيهم واخدين حقهم غصب عن عين اصحاب الدول وبيستغلوا مفهوم الحريه عند بلاد الكفر وبيطالبوا بكل بجاحه باللي مايقدروش يطالبوا بيه في بلادهم الاصليه .لكن لما بقارن بين حالي انا المصري القبطي في بلدي وحال الغريب في بلد محترمه بتحترم ابسط قواعد الانسانيه بتعب جدا وبلاقي ان الحيوان في اي بلد غربي له حقوق و قيمه اكتر من البني ادميين في بلادنا ان التعامل مع المواطن بيكون
بطريقه متدنيه جدا لدرجه ان الامن اللي مفروض يكون واجبه حمايه المواطن اتحول لبعبع
اي حد هايعترض او هايحتج او مش هايعجيه الحال الامن موجود وكان شغلته ارهاب
وترويع المواطن طبعا ده استحاله يحصل في اي دوله فيها بني ادميين بجد ولكن لاننا
مش بني ادمين بجد فا حللوا لنفسهم يقتلوا المواطن ويسحلوه وطبعا المبررات والتهم جاهزه و
موجوده زي ماحصل مع الشاب المصري خالد سعيد لما فكر بس انه يعترض علي معامله رجال
الامن له واهانتهم لابسط حقوقه كانسان اولا وكمواطن مصري له حقوق طبعا خلوه عبره لمن لا يعتبر علشان
اللي يفكر يعترض يبقي عارف هو رايح علي فين وده اللي حصل مع اقباط كنيسه العمرانيه لما فكروا يحتجوا علي التعسف
في بناء كنيسه او مبني خدمات ايا كان ايه هو اساس الموضوع من امتي بنشوف الامن المصري بينزل للشارع بالالاف
كانه في حاله حرب؟ دا علي الحدود دخلوا علينا و قتلواا اولادنا من جنود وظباط وشتمونا واتهمونا بالعملاء لاسرائيل
مافيش رصاصه واحده انضربت من جيشنا المصري علي اللي كسروا الحدود !! هو بناء كنيسه دلوقتي بقي اخطر
من كسر حدود دوله لها مكانتها زي مصر!!!
ثم ماشوفناش ان الامن نزل الشارع علشان يمنع متظاهرين الجمعه من سب واهانه البابا شنوده وهو رمز ديني
وماشوفناهمش نزلوا علشان يمنعوا حرق بيوت ومحلات المسيحيين في قنا او فرشوط او نجع حمادي او او او
ماينفعش بأي حال من الاحوال ان يتم التعامل مع المسيحي وكانه جربه!!
مش هاقول غريب لان الغريب بيجي يضربنا في بلدنا وبنقوله شكرا ابقي تعالي تاني .. ليه كده
فين الحريه في بناء دور العباده ؟؟ مش مكسوفين ان الكفره بيسمحوا ببناء مساجد في بلادهم عملا
بمبدا الحريه واحترام البشر والمصري مش عارف يبني كنيسه في بلده؟ ولا حتي يرمم فيها حيطه او سور؟
اي عقل او منطق او دين يقول كده
ده ظلم بين وافتراء و للاسف مفيش عدل ولا ضمير لانه لو فيه عدل وضمير كان يتم التعامل مع
كل المصريين معامله واحده يعني زي ما اخويا المسلم عنده الحق يبني مسجد في اي وقت ويقدر يفرد سجادته ويصلي في اي
مكان البديهــي يكون لي نفـــــس الحقوق والواجبات كمصـــــري.
اقدر ابني كنيسه اصلي فيها في اي وقت واي مكان من غير ما حد يضايق حريتي والا فان الدوله تبقي بتفرق بين المصريين
وبعضهم علي اساس الدين وده ضد مباديء وثيقه حقوق الانسان اللي مصر موقعه علي بنودها
الهياج اللي حصل ده سببه الاساسي هو اصرار الدوله علي التعسف مع الاقباط سواء في قضايا كانوا فيها ضحايا
فا لم يتم الحكم فيها لصالحهم او المماطله في اصدار قانون بناء دور العباده الموحد المودع ادراج مجلس الشعب من عشرات
السنين في حين بيتم تمرير قوانين باكملها في ساعات وكتير من الاحيان بتكون في ضد مصلحه المواطن المصري ولكن لشيء
في نفس يعقوب بتمرر القوانين دي .في النهايه عاوزه اقول للمسئولين اتقوا ربكم في الشعب
الاحساس بالظلم شيء مدمـر للانسان ومن ثم الوطن.
تقبلوا تحياتي؛؛؛؛؛؛؛؛
هناك 6 تعليقات:
بونيتا :
معك تماما في حرية العبادة والعقيدة ، واريد أن اقول شيئا ، في أساس التعامل داخل الدين وأخلاقه ، مبدأ اسمه ، عامل الناس كما تحب أن تعامل ....
اتمنى ان تكوني فهمتي الغرض من وضع ذلك المبدأ واستشهادي به ..
الاحساس بالظلم شئ مؤلم وقاتل للنفس
لكن ربنا طويل الروح كثير الرحمه
واكيد له حكمه فى طوله باله
لكن كلنا بنصرخ بصوت باعلى الصوت
للاه الاعظم انه يخلص شعبه من الظلم الواقع عليها
ربنا موجود ونصرخ طالبين منه المعونه الالهيه للخلاص
تقبلى مرورى
IMSA
انا فاهمه المبدأ وهو مبدأ عام مش خاص بدين معين
لكن اعذرني مش فاهمه الغرض من استشهادك بيه !!
تحياتي لك
ALHBALABADY
الله طويل الروح وكثير الرحمه وفي طول أناته علي البشر حكمه يمكن يرجعوا عن خطاياهم وافعالهم زي ماسبق و حذر اهل سدوم وعموره ولكن بسبب قساوه قلوبهم نزل عليهم نار وكبريت .فالله يمهل ولا يهمـــــل .
مبروك المدونة الجديدة، الرب يبارك كتاباتك. اما التعليق على المواضيع فلاحقآ انشاء الله.
بونيتا :
غرضي من الإستشهاد بالمبدأ ، إنه زي ما بنطلب إن الناس تعاملنا كويس
يبقى إحنا كمان نعامل الناس كويس ..
زي ما بنقول لينا الحرية في بناء مساجد ، يكون لغيري الحرية في بناء دور عبادته ..
زي ما بقول انا حر في نشر تعاليم ديني ، يبقى غيري كمان حر وعلى المتلقي أن يحدد إلى أي دين وملة يريد أن يتبع
سواء كان شيعي او سني في الإسلام ، أو كاثوليك أو ارذوثوكس في المسيحية ..
كل انسان حر في حريته الدينية ..
//
بخصوص الإحساس بالظلم الأمر ليس للمسيحي بمفرده ، بل عليكِ أن تنظري إلى المعتقلات واساليب القمع إنها لا تفرق بين مسلم ومسيحي ..
//
تحياتي لكِ
إرسال تعليق