هل هي دي الخدمه اللي بيقدموها لله والوطن ؟ بقتل الابرياء العزل؟
هل هو ده الجيش المصري اللي طوال 15 يوم ما اطلقش رصاصه واحده علي المصريين
ولا رفع عصايه في وجه اي شاب مصري؟
هو ده الجيش اللي اقسم ان يحافظ علي الوطن؟
هو الحفاظ علي الوطن بقي بقتل المصــــــريين؟ العــــزل؟
بزمتكم مش دي خيبه تقيله كمان؟
وعلشان ايه ومين تعملوا في ولادنا كده ؟
مش عندكم اخوات في نفس سنهم مش عندكم اي حاجه في قلوبكم من ناحيتنا تخليكم تترددوا علي اطلاق الرصاص علي شباب اعزل لا هو مجرم ولا ارهابي ولا حمل ضدكم اي سلاح؟
هل ده عقاب كل انسان بيحاول يحافظ علي بيته؟ ما الدير ده بيتهم دا بدل ما تروحوا تحموهم من البدو اللي بيهجموا عليهم في الصحراء بالالي والرشاشات تقوموا تضربوهم كده؟
بتقولوا اخدوا املاك الدوله؟ بقي مش مكسوفين علي دمكم وانتوا بتقولوا الكلام السخيف ده ؟ هي املاك الدوله دلوقتي بقت تحت السيطره وكله تمام والسور اللي مبني في الصحــراء للحمايه من المجرمين والمساجين الهاربين من سجن وادي النطرون اصبح جريمه نكراء تستدعي الرمي بالرصاص ؟
ومين من المصريين مش حاول يحمي بيته بالطريقه اللي هو شايفها وخصوصا بعد ما الشرطه انسحبت وطلعتوا قولتولنا بكل بلاهه (علي الساده المواطنون حمايه انفسهم بانفسهم)؟ مش ده كلامكم؟ طيب الراهب لا عنده سلاح ولا سنجه ولا هايمسك مطوه عاوزه يحمي نفسه ازاي؟ وخصوصا بعد ما استنجدوا بيكم وانتوا طلعتوا رجـاله و قلتولهم (احموا نفسكم) مش مكسوفين من تخاذلكم من حمايه الدير ورايحين بكل بجاحه وقذاره تضربوا في شباب اعزل لمجرد انه وقف يدافع عن بيته؟ وتهدموا السور ؟ يعني خلاص رجعتوا كل فلوس واملاك واراضي مصر المنهــوبه من الحراميه ومش باقي غير انكم تهدوا السور اللي اتبني في الصحراء لغرض الحمايه؟ يا سيدي لو حتي الموضوع اكبر وفيه تعدي علي اراضي او ما شابه ففي حاجه اسمها قانون ولا ايه الفرق بين اللي عملتوه يا جيش يا مصري وبين اللي عمله العرب برهبان دير ابوفانا من سنتين من ضرب وسحل وفقأ عنين ورجم وربط في النخل واجبار علي البصق علي الصليب ؟
مش فارقين عنهم كتير علي فكره
نفس الاسلوب
ونفس الاهداف
ونفس النفسيه الغير سويه
في التعامل مع الكائن الغريب اللي اسمه (الاقباط)
انا اشك ان فيه حاجه غلط ومش مظبوطه بتحصل
لكــــــــــــــــــــن ........
ابواب الجحيم لــــــــــن تقوي عليها
كنيستنا القبطيه وايماننا بالهنا اقـــــوي من اي دبابات او رصاص او تفجيرات
ربنا موجـــــــــــــود
هناك 22 تعليقًا:
بتعرفى تعبرى عن اللى جوايا يا بونى
تعالى اقرى اللى انا كتباه
بصى هى ملهاش حل
واحنا هنفضل كده دايما
ولازم نتعود على الاتضطهاد
مادام انا مسيحى اذا انا مظلوم ومتضطهد
واهو ربنا شايف
لـــولا وزهـــراء
كنت احب لما تعلقي عندي تقولي رايك في البوست اللي داخله تعلقي فيه
وحتي لو كنتي علقتي عند فينوس كنت هاشوف تعليقك وهارد عليكي برضه
ماتقلقيش انا مابعرفش اهرب
المهم القرضاوي بالضاد علشان ما تزعليش لكن انا بشوف علي مدونات اصحابها مسلمين بيقولوا اسمه كده علي العموم معلش جهل مني وناقل الكفر ليس بكافر ..يا لولا ماتضايقيش ولكن برضه انا بعترض عليه كشخص له مواقف غير مفهومه مثلا موقفه من القاعده الامريكيه في قطر وسكوته وعدم دعوته الشعب القطري للخروج عن الامير مع انه قطري الجنسيه وله الحق يعترض زي ما اعترض علي مبارك واهدر دم القذافي ولا مصالحه الشخصيه اعلي من انه يقول كلمه حق ؟
والشيخ حسان بتقولي عليه مش ارهابي؟ ده رايك انتي حره فيه لان انا اعرف مسلمين كتير رايهم مخالف لرايك تماما وخصوصا بعد موضوع البنت بتاعه فاقوس اللي كان ليها حكايه مع ابنه اللي اتجوزها عرفي وانكر ولما عملت مشكله قالوا انها مختله نفسيا وحجزوها في مصحه وبعد كام يوم قالوا انها انتحرت !!دا غير انه بيقول علي اسامه بن لادن (هذا البطل أسأل الله ان يحفظه بحفظه واخوانه جميعا اللذين ردوا شيئا من الكرامه المسلوبه لهذه الامه)!!! خلاص بلاش ارهابي طالما بتضايقك وقوليلي انتي بعد الكلام ده نقول عليه ايه؟
لو القس قال علي شخص زي بن لادن بطل انا اول واحده هاقول علي القس ارهابي وجبان كمان لانه بيعمل من شخص مجرم بطل ..
الماده التانيه هاتفرق معايا كتير قوي يا لولا لكن انتي كمسلمه عندك الشريعه بتاعتك موجوده جوه كتبكم الاسلاميه هاتفرق ايه بقي معاكي؟هاتنقصوا ايه من غيرها؟ انا عامله بوست خاص بالماده التانيه ياريت تدخلي تقريه وتردي عليا في اي جزئيه تشوفي ان انا مبالغه فيها
ويا ستي انا هادخل احذف التعليق من عند فينوس طالما سبب لك مضايقه مني لاني وغصب عني خرجت عن شعوري بسبب الاحداث اللي بشوفها كل يوم بتحصل لاهلي واخواتي وكأن دمنا بقي مباح لاي حد وقبل ماتحكمي عليا حطي نفسك مكاني وشوفي شعورك انتي وقتها كان هايبقي ازاي .انا بعتذرلك يا لولا وبحترم انك واجهتيني باللي جواكي .
لكن برضه انا ما زلت مصممه ان سواء حسان او القرضاوي او غيرهم هما بشر وغير منزهين عن الخطأ ومن حقي اعترض عليهم طالما عندي اسبابي لنقدهم .
نورتيني وكنت اتمني ان اول تعليق ليكي مش يكون فيه زعل مني في حاجه .
حصل خير
تحياتي لك
لولا وزهراء
ده لينك الفيديو اللي فيه الشيخ حسان بيمدح في ((البطل))اسامه بن لادن
http://www.youtube.com/watch?v=EIWZ9D7txLI
ياريت تسمعينه وترجعي تقوليلي رايك فيه ايه
تحياتي
لولا وزهراء
ده لينك الفيديو اللي فيه الشيخ حسان بيمدح في ((البطل))اسامه بن لادن
http://www.youtube.com/watch?v=EIWZ9D7txLI
ياريت تسمعينه وترجعي تقوليلي رايك فيه ايه
تحياتي
" بصي ياقمر ..ممكن اقولك بونبوناية عشان مش عارفة اقرأ اسمك (: ؟...
الشيخ حسان حر في رائيه ووجهة نظرة براحته هو شايف بن لادن بطل هو حر قد اصاب برائيه او قد اخطأ انا مش هحتكر وجهة نظري للعالم واقول لازم الكل يشوف بن لادن مش بطل زيي ... مع العلم اني مش بحب بن لادن وشايفاه مش بطل ولا حاجة ولا اللي بيعمله من الاسلام في شئ وهو لو عادى امريكا ( من العداوة) الان فهو تربى في كنفها سابقاً واتقلب السحر ع الساحر وربنا بيسلط ابدان على ابدان ومحاربة بن لادن لامريكا ونسفه لبرجي التجارة العالمي كان هدفه سياسي وليس في الاسلام من شئ .
لولا
يابونبوناية هو اي حد يقول حاجة نصدقة كدة على طول ونرمي الشرفاء بالباطل دا في القانون بيقولوا المتهم برئ الا ان تثبت ادانته ... ومينفعش نرمي الناس بالباطل
اقري دي يا ستي
http://www.scusuez.org/vb/showthread.php?t=28075
وخلي بالك من اول حرف لاخر حرف في المقال اللي بعتهولك عشان منصدقش كل شئ قبل ما نتحقق منه ... وبغض النظر عن صحة او عدم صحة الاتهام مينفعش برضه اقول على شيخ انه ارهابي حتى لو ابنه غلط ( بصي للقرائن ونفي التهمة والادلة على عدم صحتها في المقال )
- اما بخصوص المادة التانية اه هتفرق معايا يا بونبون ومع ذلك مش موضوعنا المادة التانية لانها اصلاً مش من المواد الخاضعة للتعديل فأي كلام فيها مش هيكون في محله .
- ثالثاً انا مش موافقة انك تعتذري ومش قابلة اعتذارك لان مافيش بين الاخوات اعتذارات او تكلفة او كلام من ده وربنا زعلت لما اعتذرتيلي .
لولا
لولا
بخصوص الموضوع بتاعك انا قريت مقاله للبابا شنودة ياستي وعجبني رائيه جدا جدا وكالعادة ارائه بتعجبني وقال اللي ليه واللي عليه ياعني قال مكانش يصح بناء السور ومكنش يصح الاعتراض على هدمه وتعطيل السلطات المسئولة عن الهدم ومكنش يصح الرد ويجب ضبط النفس...
- الفيديو اللي انتِ حطاه صعب كتير كتير كتير ربنا يشفى كل مصاب ويرحم كل شهيد ويجنبنا الفتن ..
- اقري رد رامي عند فينوس في موضوع ابتدينا عشان تتأكدي انها فكر مضاد للثورة .
- نسيت اقولك بخصوص المادة الثانية الكنيسة رفضت اي مزايدات في الموضوع ورفضت ان يكون فيه تعديل فيها وانهم مش معترضين على وجودها .
لولا
http://www.theflowerexpert.com/resources/default/50-long-stem-red-roses.jpg
دي بقى بوكية مني ليكِ يابونبوناية وعايزة اقولك صورة الافيتر بتاعتك جناااااااان وانا حطاها عندي من 3 سنين في سايت القاهرة اليوم ولحد الان مغيرتهاش لانها بجد تحفة احيكِ على ذوقك ورقتك في الاختيار.
لولا
لولا وزهراء
نورتي يا لولا يا عسل وانتي تقدري تقوليلي اي اسم انت تحبيه
المهم بقي انت بتقولي ((الشيخ حسان حر في رائيه ووجهة نظرة براحته هو شايف بن لادن بطل هو حر قد اصاب برائيه او قد اخطأ انا مش هحتكر وجهة نظري للعالم واقول لازم الكل يشوف بن لادن مش بطل زيي ))
وانا هاسالك سؤال بسيط وهو
هل الشيخ حسان حر في رايه لما يقول علي اسامه بن لادن الارهابي الدولي بطل ..
وانا مش حره في رايي لما اقول عليه ارهابي؟ ومش لازم اشوفه طيب وكويس زي ما انتي شايفاه ؟ ماهو انتي بتدي حسان الحق والحريه يقول رايه في شخص لا يختلف عليه اتنين انه ارهابي
وحجرتي علي رايي انا فيه !!!
ده اولا يا لولتي ومش عاوزاكي تضايقي من كلامي لاني صريحه شويتين .
ثانيا يا جميله ما نقدرش نقول ان الهدف سياسي لان اسامه بن لادن لا هو رئيس دوله ولا له اي دخل في السياسه
ولكنه معروف انه متطرف مسلم وبيعمل اي عمليه ارهابيه بناء علي افكاره الجهاديه ضد الكفار وعلي فكره كان ابنه عمرو في التليفزيون مع محمود سعد وقاله والدي مقتنع جدا باللي بيعمله لانه عنده ما يؤيده من ايات وللان مفيش حد قادر يقنعه بغير كده لو انتوا شافينه غلط ناقشوه في افكاره ..ده حوار مسجل علي التليفزيون وممكن ترجعي تشوفيه علي اليوتيوب وده دليل من عمر ابن اسامه ان والده شايف انه صح وبينفذ تعاليم دينه كما يراها صحيحه بدليل ان مافيش حد عارف يقنعه بغيرها للانوده يوصلنا ان الموضوع عمره ماكان سياسي .
لا يا لولا انا قلت عليه ارهابي لانه بيمدح ارهابي زي بن لادن وبيقول عليه بطل !!يا لولا دي السعوديه نفسها سحبت منه الجنسيه بسبب تطرفه واحتكاره للارهاب وقتله للاطفال والنساء.
ثم ببساطه كده لو واحد بيشجع الدعاره هايبقي ايه؟
لو واحد بيشجع السرقه هايبقي ايه؟
لو واحد بيشجع المثليه هايبقي ايه؟
هل وقتها هاتقولي عليه هو حر في راييه؟وهو شايف كده ؟
طيب طالما هو حر انا برضه حره في رايي فيه وفي الماده التانيه وانا شايفه كده انها بتظلمني
ماينفعش يا لولا نعطي الحق لانسان طالما احنا معاه او بنحبه
ونحرم الحق ده من انسان تاني طالما احنا مختلفين معاه سواء في الراي او في الديانه او في اي حاجه تاني
الحريه يا لولا لا تتجزأ
ماينفعش نمنحها لشخص ونسلبها من التاني طالما قلنا في حريه يبقي لازم تبقي حريه كامله وحقيقيه ولكل الناس ومش لحساب طرف علي حساب الاخرين.
لولا وزهراء
برضه يا لولا انتي مش عاوزه تقولي رايك في البوست :) وجايه تقوليلي رايك في مقاله للبابا شنوده
يا لولا البوست مش ليه دخل بالبابا شنوده نهائي انا بشوف حاله وبحللها من وجهه نظري انا والبوست ده عباره عن احساسي انا في اللي بيحصل حواليا.
اما البابا شنوده كلنا بنحترمه ونقدره ولكن لازم نفهم انه رجل سلام بحكم مكانته الدينيه مش مطلوب منه اي راي يخالف الكتاب المقدس وتعاليمه اللي بتدعو لمحبه حتي اشد الاعداء.
اما كلامه عن الماده التانيه فهو قال انه بيرفض المساس بالماده التانيه ولكنه يتمني لو يتم اضافه جزء خاص بان الاقباط يحتكموا لشرائعهم في ما يخص حياتهم .وطبعا ده رايه وهو حر فيه لكن انا برفض الحل ده كمان واشوف انه انانيه في التفكير ..ليه بقي؟
لان مصر مش مسلم ومسيحي وبس
مصر فيها شيعه وبهائيين ويهود و علمانيين وملحدين ولا دينيين والناس دول ليهم نفس الحقوق اللي للمسلم والمسيحي وعليهم نفس الواجبات برضه يبقي ليه احنا عاوزين نشيلهم من حساباتنا؟ كنت اتمني ان البابا وغيره من الناس قبل ما يفكروا في نفسهم او في اتباع اديانهم يفكروا في المصريين ككل
ويراعوا مصالح كـــــل المصريين من غير تمييز
انا مسيحيه وبقولك انا ضد الكلام ده ولو كنت اغلبيه برضه كنت هاقول نفس الكلام لان من حق كل انسان شيعي بهائي يهودي ملحد او بوذي او حتي عابد نار انه يعيش بحريه في وطنه طالما مكتوب في خانه الجنسيه مصـــــــــــري يبقي له نفس الحق في مصر لانها بلده زي ماهي بلدي وبلدك .ده رايي يا لولا في موضوع الماده التانيه لانها بتدي مزايا لمواطن علي حساب باقي المواطنيين علي اساس الدين وده مخالف تماما للماده 40 من نفس الدستور المصري اللي بتقول ان المواطنين جميعهم متساويين امام القانون و((لا يتم التمييز)) بينهم علي اساس اللون او الجنس او ((االدين)) او اللغه او العقيده.وبرضه هو مخالف تماما للماده الاولي اللي بتنص علي مبدأالمواطنه.
اما حكايه السور فانا اللي اعرفه ان الدير وقت الانفلات الامني راح عليه مساجين وادي النطرون و طلبوا اكل من الرهبان وبالفعل قدموا لهم الاكل ومشيوا بعدها ولكن حصل ضرب نار من البدو علي الدير وكانوا عاوزين ياخدوا ارض عن طريق وضع اليد مستغلين حاله الفوضي وغياب الامن ولما الرهبان اتصلوا بالجيش قالولهم (دافعوا عن نفسكم) قوليلي انتي الراهب اللي عايش في الصحراء اعزل من غير سلاح هايدافع عن نفسه ازاي لا هو ساكن في عماره فا هايقفل الباب بتاعها وخلاص ولا هايقف في الشارع مع جيرانه بسنجه زي ما اغلبنا عمل كده. دي ناس عايشين في صحراء يا لولا وانا مش ببرر لهم لكن انا شايفه ان بناءهم للسور مش مقابله ابدا ضربهم بالرصاص الحي
حتي لو اعترفنا بانه قرار بناء السور قرار غير حكيم لكنه حصل بدافع حمايه الدير .
يبقي كان المفروض الجيش يتفهم ده وكان اتعامل بطريقه اكتر انسانيه مع الرهبان وخصوصا انهم لاحراميه ولا متعهدي اجرام علشان يكون الرد عليهم بالرصاص .واللي بيقولك املاك الدوله ده شخص معدوم الضمير لانه من باب اولي يرجعوا املاك الدوله المنهوبه من هشام وعز وجرانه والعادلي وزهير وجمال مبارك واخو سوزان ونظيف والفقي ورشيد وابو العنيين وسرور والشريف وزكريا عزمي وغيرهم وغيرهم كانوا يرجعوا المليارات المسروقه من فلوسنا وملايين الاراضي الزراعيه اللي مبني عليها قري سياحيه كامله للحراميه الكبار وللان الجيش لا راح رجعها للشعب لا بالقوه ولا بالتفاهم و للان مش قادرين يحاكموا الحرامي الكبير بتاع الناس دي يبقي خلاص الكام متر اللي اتبني عليهم السور بقت قضيه امن قومي عند الجيش ؟
لما رايح يضرب ناس عزل بالنار اومال لو مجرمين وحراميه كان عمل معاهم ايه؟
انتي بقي لو مكاني وبتشوفي اخواتك المسلمين بيتعمل معاهم كده من جيش بلدك بسبب انهم بنو سور يحمي مسجد وتم اساءه معاملتهم كان احساسك وقتها هايبقي ايه؟
:((
- انا مش هتكلم في موضوع المادة التانية تاني يا بونبوناية لانها مجال مجادلة وهي مش موضع للتعديل اصلاً فكلامنا عنها هتعتبر مزايدة ومجادلة وانا موش حابة كدا ...
- ثانياً بن لادن الشيخ حسان بينظرله مش من منظور سياسي لأ من منظور اخر بمعنى انه شايفه كويس لانه بيحارب امريكا اللي سامحة لاسرائيل انها تقتل في غزة ياعني في نظرة بن لادن بطل لانه قدر يقف في وجه طاغية زي امريكا بتقتل في شعب اعزل وهي اسرائيل فهمتي ياقمر؟
ياعني لا بيشجع الارهابيين ولا حاجة ومعلهش يا بونبون متقوليش عليه برضه ارهابي من فضلك (: مش معنى اني مختلفة معاه في وجهة النظر اني اتهمه بالعداء والارهابية. لما اجبلك لوحة فيها شجرة كريسماس وتلج وبيوت مغلقة والنور جواها واحدة هتقولي احساس بالدفئ وواحدة هتقولي احساس بالبرد... الاولى شافت من زاويتها الناس جوا بيوتها مولاعة الدفاية وعيلة ولمة والتانية شافت التلج اللي برة واد ايه احساس البرد طاغي ع اللوحة ياعني الشيخ حسان شاف من نظرة فيها تمرد على جبروت امريكي وانتي شوفتي نظرة تانية .
- بالنسبة لرائي في البوست انا قولته فعلاً !!!
"بخصوص الموضوع بتاعك انا قريت مقاله للبابا شنودة ياستي وعجبني رائيه جدا جدا وكالعادة ارائه بتعجبني وقال اللي ليه واللي عليه ياعني قال مكانش يصح بناء السور ومكنش يصح الاعتراض على هدمه وتعطيل السلطات المسئولة عن الهدم ومكنش يصح الرد ويجب ضبط النفس...
- الفيديو اللي انتِ حطاه صعب كتير كتير كتير ربنا يشفى كل مصاب ويرحم كل شهيد ويجنبنا الفتن ."
انتي عرضتي الفيديوهات وانا علقت واستشهدت بمقالة البابا شنودة وياقمر لو رائي مش محل تقدير منك قوليلي انتي عايزة اقولك ايه وانا اقوله غشيشيني :d
- حكاية دير النطرون انهم اخدوا قطعة ارض ملك للدولة وبنوا حولين الدير سور وجهة نظر من زاوية بتقول للحماية ووجهة نظر بتقول وضع يد على ارض مش ملكهم عايزين يدخلوها ويضموها للدير الجيش جه يهد بعد ما اخدوا امر باسترداد ارض الدولة هما قالوا لا وعطلوا الاجراءات ده اللي انا اعرفه وعشان كدا قولتلك رائ الباب شنودة ايه ...
لولا
ثانيا يا جميله ما نقدرش نقول ان الهدف سياسي لان اسامه بن لادن لا هو رئيس دوله ولا له اي دخل في السياسه
ولكنه معروف انه متطرف مسلم وبيعمل اي عمليه ارهابيه بناء علي افكاره الجهاديه ضد الكفار وعلي فكره كان ابنه عمرو في التليفزيون مع محمود سعد وقاله والدي مقتنع جدا باللي بيعمله لانه عنده ما يؤيده من ايات وللان مفيش حد قادر يقنعه بغير كده لو انتوا شافينه غلط ناقشوه في افكاره ..ده حوار مسجل علي التليفزيون وممكن ترجعي تشوفيه علي اليوتيوب وده دليل من عمر ابن اسامه ان والده شايف انه صح وبينفذ تعاليم دينه كما يراها صحيحه بدليل ان مافيش حد عارف يقنعه بغيرها للانوده يوصلنا ان الموضوع عمره ماكان سياسي .
" يا بونبوناية ماليش دعوة برأي عمرو بن لادن في عمليات والده هو حر.... ( انا مش شيفاها من الاسلام ) انا مش جاية اناقش رأي بن لادن وابنه انا بدافع عن فكرة ان حسان ارهابي ...وانا محجرتش على رأي القمر ... انا بس مش عاوزة يكون ده اتهام لبرئ لكن براحتك بس برضه متقوليش ارهابي :d شوفتي الديموقراطية "
لولا
بقي كان المفروض الجيش يتفهم ده وكان اتعامل بطريقه اكتر انسانيه مع الرهبان وخصوصا انهم لاحراميه ولا متعهدي اجرام علشان يكون الرد عليهم بالرصاص
" انا عارفة ان حدث مشادة لانهم عطلوا اجراءات الهدم والجيش قال انه ل يحدث اي اعتداءات من قبل على الدير ...ولكن ان حدث اي اعتداء بلا شك هذا مرفووووووووووووض مرفووض مرفوووووض
لولا
لـــولا وزهـــراء
يا لولا انتي بتقولي انك مش هاتتكلمي في الماده التانيه لانها مسار جدل ..
وانا بفكرك ان كلامي معاكي في الماده التانيه كان ((رد)) علي سؤال منك وجهتيه ليا لماسألتيني (ايه مشكلتك مع الماده التانيه) وعلشان كده انا جاوبت عليكي يبقي مش ينفع لما تسألي وانا اجاوب واقول رايي واتناقش معاكي ترجعي تقفلي باب الحوار من طرفك وتقوليلي مش هانتكلم فيها لانها مسار جدل مع انك انتي اللي بدأتي الكلام معايا فيها.
عامه مافيش حاجه فوق المناقشه يا لولا ايه المشكله لما نتناقش فيها او في اي حاجه غيرها ولا انتي مع انها ماده فوق دستوريه ؟؟ طيب انا مصممه اتناقش معاكي فيها ومصممه اعرف رايك فيها
وده من حقي طالما انتي بدأتي وسالتيني عن سبب اعتراضي عليها وانا جاوبتك .
:))
لولا وزهراء
ثانياً بن لادن الشيخ حسان بينظرله مش من منظور سياسي لأ من منظور اخر
ايه بقي هو المنظور الاخر ده يا لولا؟
ياريت تحددي لي مصطلح محدد لرؤيه الشيخ حسان للبطل اسامه بن لادن .
يعني انه بينظرله من منظور .....(كذا)
يا لولا لو سمحتي انتي اللي ما تحجريش علي رايي .انا شايفاه كده ايه المشكله؟انا حره يا حبيبتي ودي وجهه نظري انا انسانه ربنا خلقني حره وكامله وفاهمه وعاقله وشايفاه كده !!
انتي بقي شايفاه ملاك وزي العسل وطيب وكل الحاجات الحلوه فيه برضه انتي حره في رايك ودي وجهه نظرك انا احترمها ومش هاحجر عليها لانك حره وده رايك وانا مش ليا اني اطلب منك تغيريه حتي ولو اختلفت معاكي فيه والا ابقي بفرض رايي عليكي بالاجبار :))
بقي ايه دخل شجره الكريسماس بالشيخ حسان؟ حرام عليكي يا لولتي هاتموتيني ناقصه عمر :((
مفيش وجهه مقارنه بين شجره الكريسماس البدعه الكافره وبين الشيخ حسان
مش معنى اني مختلفة معاه في وجهة النظر اني اتهمه بالعداء والارهابية
يا سلام يا لولا جيتي علي الوجع اذا كان الشيخ نفسه بيتهمني أنـــا وكــل شخص مختلف معاه في الدين بالكــــــــفار
يبقي من باب اولي توجهي كلامك لسماحه الشيخ وتعدلي له من مفاهميه ضد الاخر المخالف له في العقيده .
مين اداله الحق يقول علينا كفار؟ وهل كلمه ارهابي اكتر فظاعه وفظاظه و بشاعه من اتهاماته هو للمخالف له بالكفر ؟!!
وياقمر لو رائي مش محل تقدير منك قوليلي انتي عايزة اقولك ايه وانا اقوله غشيشيني :d
العفو يا لولا مين قال ان رايك مش محل تقدير مني؟هل انا تجاهلت كلامك من البدايه وعملت مش واخده بالي منه مثلا علشان تقولي كده؟اومال انا بقالي كام يوم بتكلم مع مين ؟ لو انا زي مابتقولي كنت بكل بساطه تجاهلت تعليقك من الاساس لكن انا رديت ووضحت واعتذرت هنا وعند فينوس لاني مش بخاف اني اعتذر علي اي خطأ صدر مني سواء بقصد او بدون مع اني مش مجبره اعمل كده ..
لكن اللي عاوزاكي تتاكدي منه ان انا (أي) رأي سواء متفقه معاه او مختلفه هو محل تقدير مني وانا للاسف مابعرفش اغشش حد لاني مابعرفش اغش من حد يا لولا ودي مشكله عندي بعترف بيها :((
يا بونبوناية ماليش دعوة برأي عمرو بن لادن في عمليات والده هو حر.... ( انا مش شيفاها من الاسلام )
ولا انا قولت اني شايفاه من الاسلام انا بقول ان الراجل من (وجهه نظره)شايف انه ماشي صح وبينفذ تعاليم دينه كما يراها هو وده كان نص كلامي بالتحديد:
(( ان والده شايف انه صح وبينفذ تعاليم دينه كما يراها صحيحه))
اذن انا كنت بنقل علي لسان ابن اسامه مش كنت بقول وجهه نظري انا الشخصيه ودي تفرق كتير يا لولتي.
انا بس مش عاوزة يكون ده اتهام لبرئ لكن براحتك بس برضه متقوليش ارهابي :d شوفتي الديموقراطية "
لا ده مش اتهام ده رأيي انا الشخصي وانا مازلت عليه
وهي دي قمه الديموقراطيه يا لولتي انك تقولي رايك بصراحــه شديده جدااااا ومن غير خـــوف لان حريه الراي مكفوله للجميع
نورتيني يا جميله ومبسوطه بالكلام معاكي
ودائما الاختلاف في الراي لا يفسد للود قضيه.
تحياتي
معلشى يا بونيتا انا موضوع الجيش اللى قتل وخرب ده مش قادرة اصدقه لانه بشهادة بعض العرب فى المنطقة انهم شافوا سلفيين منتشريين فى المنطقة وبعدها سمعوا عن احداث القتل والرصاص اللى انضرب على المسيحيين .. اما موضوع هدم السور فانا ضده بالمرة حتى لو كان ازالة حجر من تواليت الكنيسة وده اسوة بالمسجد اللى بيتلم له فلوس من يوم ما اتولدنا لحد ما نموت تحت شعار تبرعوا لبناء المسجد
من مراجعتى للتعليقات يا بونيتا شايفه انك بتضيعى وقت اسمحى لى بعد اذنك اكلمك بالطريقة دى
محمد قطران ايه وبن لادن ايه اللى مضيعه وقتك علشانهم ؟
محمد حسان ده يا قمر اللى متجوز 8 اكبر واحدة فيهم سنها 40 سنة رغم ان سنه فوق الستين ؟ واخر جوازة عمرها 21 سنة بيبدل فيهم على اساس انه بيدبل فى الشرابات ؟
الا هو رجل الدين ميعرفش ان المتذوقين والمتذوقات فى النار ؟
محمد حسان اللى بتضيعى وقتك عليه ده يا قمر لو فعلا راجل دين زى ما بيدعى مع العلم ان مفيش وظيفة اسمها راجل دين حتى النبى محمد نفسه مش كان اسمه رجل دين رغم انه نبى ورسول ولو كان تاجر فى الدين زي محمد قطران واو اسحاق الحيوان والقرداوى كان مات وهو اغنى اغنياء العالم لكنه للاسف مات ودرعه مرهون لدى يهودى يبتاع منه طعام لاهل بيته لان ماله كله كان ضايع على الدعوة عكس حسان والقرداوى ومن شابههم تجار الدين الذين يملكون القصور وارصدة متورمة فى البنوك والدروايش والمتخلفين والمغيبين تركوا القرآن والسنة واخدوا يقدسوهم بل احيانا وصولوا انهم ممكن يعبدوهم ده ان مش كانوا فعلا بيعبدوهم شوفتى بقى الفرق بين رجل الدين الحقيقي ؟
محمد قطران ده لو فعلا رجل دين كان لما احمد ابنه اللى عمره 21 سنة وبيتشغل مدير فى قناة الرحمة زنا مع بنت اسمها شرين والبنت كانت حامل منه لما راحت لمحمد حسان لو راجل دين فعلا كان خلى ابنه يصلح خطأه مش يعرض عليها فلوس علشان تمشى ولما البنت ترفض يطردها من البيت ولما البنت راحت تعمل محضر قالوا عليها مجنونة وطالبوا بعمل فحص لعقلها وكان الغرض هو قتل البنت داخل المصحة النفسية .. تفتكرى ده رجل دين ولا داعر لا يستحق انك تجهدى نفسك وتضيعى وقتك على امثاله ؟
مستنية ايه من داعر بالاخلاق دى بيتاجر بشرف بنات الناس ومن قبلها تاجر بالدين فى انه يتكلم عن ارهابى زى بن لادن ؟ بن لادن عميل السوفييت والامريكان مش اقل منه فى شغل الدعارة والانحلال الاخلاقى يبقى قوادين بيشهدوا لبعض يا قمر
تحياتى ليكى ونصيحة من اخت لا تعرفيها ولا تعرفك لا تضيعى وقتك مع من تركوا الله ويقدسون المتلاعبون بكلام الله
Desert cat
يا قطه الفيديوهات عندك تقدري تشوفيها علي فكره الاعتداءات دي ما حصلتش علي دير واحد لآ دا في اكتر من دير وفي اكتر من محافظه و برضه يا قطه مش كل اللي في الجيش ناس معتدله ما يمنعش ان في كل مكان فيه ناس متعصبين وحكايه هدم السور دي مش محتاجه واحد ارهابي علشان يعملها في ناس كتير تتمني تعمل كده واهو كله خدمه :))
وياريت الناس كلها رأيهم زيك كده
كان زمان مصر حالهابقي غير الحال
نورتيني يا قمر
تحياتي
لا تحزنى يا غاليه
انا بصبرك وبصبر نفسى
هى ايام صعبه لازم نمر بيها
ربنا يثبت اولاده فى الايمان
ارجو انك تسمحيلي اقولك إني متفقة مع قطة الصحراء. لما حد يقوللي انه مش فاهم فين الغلط في كلام الشيخ حسان الرد عليه حيكون تحصيل حاصل. بعد كل الأحاديث بتاعت الشيخ حسان اللي مش شايف حقيقته يبقى ده لانه من جوَّاه متفق معاه حتى لو تظاهر بالإعتدال.
احنا مضطهدين وحنفضل كده مهما تغيرت الأنظمة لإن القلوب والعقول مااتغيرتش. نظرة سريعه على الاحداث بعد 25 يناير تخليني أجزم إن لو الحكاية كملت على كده حيبقى مستقبل مسيحيي مصر ومسلميها المتفتحين وطبعا اللا دينيين مظلم جدا. مش السنة دي أو اللي جاية. بس أكيد المستقبل القريب.
شوفي مين النهارده متزعم ميدان التحرير. مش شباب الحرية والعدالة لكن مجموعة مخيفة من الناس. لسة شايفة خبر عن صفوت حجازي بيتكلم كانه رئيس دولة ميدان التحرير. ومش هو اللي مخوفني اللي مخوفني تعليقات الناس المعجبة به واللي أكيد شافوه على قناه الناس بيروج للطائفية. أكيد شافوه في موقفه من قضية أحمد الفيشاوي وأكيد شافوه وهو بيقول كل السافرات عاهرات ولسة عاجبهم.
المشكلة مش بس في الإخوان أو شيوخ الفتنة. المشكلة في غالبية المصريين اللي التعصب والتحجر بقى مزروع جواهم ومعشش في قلوبهم حتى لو حاولوا يتظاهروا بغير ده. متمسكين بمادة دستورية مخالفة لأبسط حقوق الإنسان لانهم متخيلين إن دينهم من غيرها حيضيع والأخلاق حتبوظ.
تسمعي كتير يقولوا إنهم ضد اضطهاد المسيحيين لكن لو اتكلمتي معاهم حتلاقي بين الكلام شعور مستخبي بيبرر الاضطهاد ويلاقيله مبررات عجيبة. واحدة صاحبتي المفروض إنها مثقفة وصاحبة فكر متحرر قرصت عليها شوية في المناقشة لقيتها فجأة غصب عنها بتقوللي مانتم أصلكم مش موحدين بالله.
لينا رب يحمينا وفي نفس الوقت لازم نحاول نوصل صوتنا مهما كان صادم. برافو عليكي إنك بتقولي وما بتزوقيش الكلام. يعني إيه احمدوا ربنا انكم عايشين كده وصوتكم علي (زي مانكون عبيد صوتهم علي على اسيادهم) في دولة مسلمة؟ يعني إيه الدين الاعلى؟ أعلى عند مين؟ مادام بنموت وينداس علينا يبقى على الاقل نموت واحنا بنقول لأ لكل الكلام الفارغ اللي بنسمعه.
غير معرف
اسمحي لي انا كمان اشكرك واوافقك علي كل كلمه قولتيها و كلامك صحيح وفي محله تماما
وبالفعل حتي ولو فيه ناس بتتظاهر بالاعتدال لكن من جواهم تأييد صامت لما يحدث للاقباط من اضطهادات في مصر
فعلي سبيل المثال لا الحصر
لما الامن الارهابي ضرب اولادنا في العمرانيه طلع علينا الاعلاميين بدون استثناء يقولوا ان الشباب هو اللي ابتدأ وهاجم الامن طبعا كانوا بيبرروا قتل اولادنا لصالح الامن
مع ان الكلام ده غير صحيح ومغالط فيه جدا بدليل ان الامن هو اللي راح لغايه عندهم في الكنيسه استفزهم وضربهم بالرصاص الحي .
علي الرغم من وجود الفيديوهات اللي صورت الامن وهو بيكسر في رصيف الكوبري وبيضرب بيها المسيحيين من فوق الكوبري وكان بيساعد الامن في تكسير الحجاره مجموعه من الشباب المتعصب اللي شايف ان بناء كنيسه تهديد لدينه ومقاومه بنائها جهاد!!!
انما وجود بيوت للدعاره وخمارات وحانات وملاهي ليليه وفنادق خمس نجوم للوافدين الاجانب والعرب لممارسه القرف في مصر مع المصريات وبيقرفونا باطفال مجهولي النسب مالين شوارع مصر مش حرام ومش تهديد للقيم والدين !!
عندنا ازمه ضمير من الاخر والاعلام الغير محايد بيساعد علي تهييج الشارع علينا ومش فاهمه لمصلحه مين يحصل كده ان الكل يتفق علينا !!
نضرب ولما نشتكي نطلع احنا اللي همج وبلطجيه . في حين لما الشرطه ضربت المتظاهرين في يناير العالم كله اتقلب عليهم .اقولك علي حاجه وقت احدات العمرانيه كنت بتابع الخبر علي موقع مصراوي وقريت تعليق مستفز لشخص واضح جدا ان التعصب والكره بينقط من كلامه الاخ المحترم كاتب بيقول(بصراحه لاول مره الامن يكون علي حق) !!
متخيله ؟ الامن اللي كل الناس رايحين جايين يشتموا فيه ويشتكوا من سوء معاملته للمواطنيين طلع المره دي اول مره يبقي علي حق عارفه ليه؟ لانه بيضرب في المسيحيين ولان الضرب في المسيحيين حاجه بتشرح قلب ناس متعصبه ومريضه كتير فالاخ شاف وقتها ان الامن علي حق وان الغلط اكيد علي الهمج الاقباط اللي اتجرؤا علي اسيادهم واعترضوا علي منع بناء كنيستهم .
طول ما الانسان من جواه اتربي علي انه الاعلي وباقي البشر هم الاوطي وطول مافي ناس بتحلل لنفسها تتعب غيرها وتتلذذ بالامهم عمرنا ما هانتقدم زي باقي البشر .السبب الرئيسي لتقدم اي دوله هو العدل والمساواه بين البشر (اي بشر) من غير النظر لدين او جنس او لون .انما احنا الحمد لله خيبتنا قويه وشكلنا مش عاوزين نتقدم خطوه. لأ احنا بنرجع قرون لوراء بسبب التعصب الاعمي وكره وعدم قبول الاخر بسبب دينه او افكاره .
تحياتي لك ونورتي المدونه بوجودك
إرسال تعليق