الجحـش قـال للحمـار

الجحش قال للحمار *** يابا اديني الحنطـــور
يابا إنت سـنّك كبر *** و وَجَب عليّا الـــدور

كَــحّ الحمــــار كَـحة *** فزعِت لها الركــاب

مش يابني بالصحة *** ده كل شئ بحســـاب

و ســـــواقة الحنطور *** محتاجة حدّ حكــيم

و إنت عينيك فارغة *** همّك على البرســيم

قوللي تسوق إزاي *** و التبن مالـــي عينيك

ده حتى حبل اللجام *** واسع يا إبني عليـــك

إعقل و بطّل طمع *** لا تســخّن الركــــاب

ماتجيش يا واد جنبهم ** لا تبقى ليلة هباب

دول صنف ناس جبّار ** قادر مالوهش أمان

يبان عليهم وَهَـــــــــن *** لكنهم فرســـــــــان

يابا دا نومهم تِقِل *** و بقالُــــــــــه يابا ســنين

كل البشر صحصحوا *** و لسه دول نايمين.

يا جحش بطّل هبل *** و بلاش تعيش مغرور

رُكابنا مــش أغبيا *** ولا عضمهم مكســور

بُكرة حيصحــــولك *** و يزلزلوا الحنطـــور

و تلاقي في قفاك *** تمانين مليون خازوق محشور

تحيه للرائع عــــم / احمد فؤاد نجم