بصراحه المثل ده افتكرته اليومين دول لما سمعت باخبار حرق وهدم كنيسه اطفيح
وعلي حسب روايات كهنه الكنيسه وبعض شهود العيان من القريه في وسائل الاعلام فهمت ان في علاقه ما كانت بين راجل مسيحي متجوز وسيده مسلمه متجوزه برضه وان الخبر انتشر في القريه فا طبيعي الناس ثاروا من الموضوع ده والعلاقه الغير سليمه دي وتم عمل قعده عرفيه جمعت مابين كبار المشايخ في البلد وكبار العائلات المسيحيه للوصول الي حل للمصيبه دي وتم اتخاذ قرار جماعي برحيل الشخص(( المسيحي )) ده من القريه باكملها لانه شخص غير مرغوب في وجوده سواء علي المستوي القبطي او المسلم طبيعي شخص زي كده لازم يكون منبوذ من كل الاطراف .
نيجي بقي للسيده(( المسلمه)) اللي هي الطرف التاني في القصه دي
يقـال ان حصل خلاف داخل اسرتها بسبب ان ابن عم والدها عاوز يقتلها كنوع من غسل العار وبين والدها اللي حاول تهريبها خوفا عليها من القتل . اذن يا جماعه الخلاف هنا بين شخص وابن عمه علي قتل بنتهم بغض النظر عن سبب القتل ايه .
لكن للاسف تطور الخلاف بينهم الي تبادل اطلاق للنار ترتب عليه مقتل والد السيده علي يد ابن عمه ومقتل ابن العم علي يد والد السيده واصابه شخص تاني من نفس العائله برصاص في رجله يعني من الاخر خلاف عائلي بين اتنين ادي الي قتلهم لبعض .
اللي حصل بعد كده انه تم دفن القتيلين والتوجه مباشره للكنيسه الموجوده داخل المنطقه لحرقها وتكسيرها وهدمها !!
وانا بجد مش فاهمه ايه دخل الكنيسه في الفيلم الهابط ده من الاساس ؟
واحد و واحده غير محترمين ايا كانت ديانتهم هما الاتنين ايه دخل دور العباده في قصتهم ؟
هل لو الراجل والست دول من نفس الديانه كان الاهالي راحوا حرقوا المسجد وهدموه وداسوا الكتب الاسلاميه فيه برجليهم؟
اكيد الاجابه هي لا واستحاله ده يحصل ... ليه؟
لان بالعقل كده وببساطه المسجد ايه دخله بانحراف سلوك بعض الاشخاص المسلمين .
يبقي نفس الفكره لو طبقناها علي الكنيسه .
الكنيسه ايه دخلها بانحراف سلوك اي شخص مسيحي؟
الكنيسه مكان للعباده والارشاد الروحي لاي انسان يطلب ارشادها ومساعدتها لا هي جهه رقابيه علي تصرفات المسيحيين ولا غيرهم .
يبقي ليه الربط بين اللي حصل وبين ان رد الشرف اللي سال لازم يكون من الكنيسه ومن مسيحيين ابرياء لا ليهم في الطور ولا الطحين ؟ مع التنبيه ان دي مش حاله اغتصاب دي علاقه بالتراضي بين الاتنين ان صحت القصه ..
لحد امتي هاتفضل الكنيسه والاقباط يدفعوا تمن اخطاء هما مش طرف فيها ؟
هو غسل العار يبقي بحرق الكنايس؟ علي اساس ايه بيعملوا كده؟
هي الكنيسه قالتلها تروح للراجل وتحبه ومش تراعي الدين والعرف والعادات والتقاليد بتاعه بلدها ؟؟ ولا الكنيسه قالت للمحترم التاني يروح يمشي معاها؟؟
ثم الادهي من كل ده الجيش الهمام اللي الاقباط استنجدوا بيه لما اتكرم عليهم وجه بعد خراب مالطا قاعد ياكل بسكويت ويشرب حاجه ساقعه ويتفرج علي الكنيسه وهي بتتهدم وتتحرق وعلي البيوت وهي بتتنهب وعلي نساء وبنات الاقباط والارهابيين بيتحرشوا بيهم داخل بيوتهم !!
والحجه ايه المره دي ؟؟ قال ايه يا حلويييين؟؟؟؟؟؟؟؟؟
مش عنده اوامر باطلاق الرصاص والتعامل مع المدنيين .
يا سلام ع الحنيه ..يا سلام ع الانسانيه
يلا مش عايزه اتهور واقول كلام يضايق الناس لكن عايزه اسال سؤال بسيط للجيش :
وهل وقت ما روحتوا علي الدير وضربتوا الرهبان العزل واستخدمتوا الرصاص الحي في التعامل معاهم (بسبب حته سور اهبل) مع انهم لا مجرمين ولا حراميه ولا حرقوا دار عباده ولا روعوا ناس آمنه جوه بيوتهم زي اللي حصل في قريه صول باطفيح .
هل وقتها كان عندكم اوامــــــــــــــــر بالتعامل مع الرهبان بالرصاص الحي؟اتفرجوا علي محتوي الفيديو ده وياريت ياريت حد يفسرلي ايه اللي بيحصل بالظبط و هل اللي بيحصل من الغوغاء دول في الكنيسه شيء يرضي ربنا؟
هل سمعنا ان في ناس كفره بلا دين بيعملوا كده في اماكن عباده خاصه بمسلمين او مسيحيين او يهود ؟
لأني بجد .. تعبت م التفكير والتحليل والكلام
لكن فيه حاجه اخيره عايزه اقولها ...
اللي بيحصل ده ..عار علي كل مصري محترم وصاحب ضمير..
هل هي دي الخدمه اللي بيقدموها لله والوطن ؟ بقتل الابرياء العزل؟
هل هو ده الجيش المصري اللي طوال 15 يوم ما اطلقش رصاصه واحده علي المصريين
ولا رفع عصايه في وجه اي شاب مصري؟
هو ده الجيش اللي اقسم ان يحافظ علي الوطن؟
هو الحفاظ علي الوطن بقي بقتل المصــــــريين؟ العــــزل؟
بزمتكم مش دي خيبه تقيله كمان؟
وعلشان ايه ومين تعملوا في ولادنا كده ؟
مش عندكم اخوات في نفس سنهم مش عندكم اي حاجه في قلوبكم من ناحيتنا تخليكم تترددوا علي اطلاق الرصاص علي شباب اعزل لا هو مجرم ولا ارهابي ولا حمل ضدكم اي سلاح؟
هل ده عقاب كل انسان بيحاول يحافظ علي بيته؟ ما الدير ده بيتهم دا بدل ما تروحوا تحموهم من البدو اللي بيهجموا عليهم في الصحراء بالالي والرشاشات تقوموا تضربوهم كده؟
بتقولوا اخدوا املاك الدوله؟ بقي مش مكسوفين علي دمكم وانتوا بتقولوا الكلام السخيف ده ؟ هي املاك الدوله دلوقتي بقت تحت السيطره وكله تمام والسور اللي مبني في الصحــراء للحمايه من المجرمين والمساجين الهاربين من سجن وادي النطرون اصبح جريمه نكراء تستدعي الرمي بالرصاص ؟
ومين من المصريين مش حاول يحمي بيته بالطريقه اللي هو شايفها وخصوصا بعد ما الشرطه انسحبت وطلعتوا قولتولنا بكل بلاهه (علي الساده المواطنون حمايه انفسهم بانفسهم)؟ مش ده كلامكم؟ طيب الراهب لا عنده سلاح ولا سنجه ولا هايمسك مطوه عاوزه يحمي نفسه ازاي؟ وخصوصا بعد ما استنجدوا بيكم وانتوا طلعتوا رجـاله و قلتولهم (احموا نفسكم) مش مكسوفين من تخاذلكم من حمايه الدير ورايحين بكل بجاحه وقذاره تضربوا في شباب اعزل لمجرد انه وقف يدافع عن بيته؟ وتهدموا السور ؟ يعني خلاص رجعتوا كل فلوس واملاك واراضي مصر المنهــوبه من الحراميه ومش باقي غير انكم تهدوا السور اللي اتبني في الصحراء لغرض الحمايه؟ يا سيدي لو حتي الموضوع اكبر وفيه تعدي علي اراضي او ما شابه ففي حاجه اسمها قانون ولا ايه الفرق بين اللي عملتوه يا جيش يا مصري وبين اللي عمله العرب برهبان دير ابوفانا من سنتين من ضرب وسحل وفقأ عنين ورجم وربط في النخل واجبار علي البصق علي الصليب ؟
مش فارقين عنهم كتير علي فكره
نفس الاسلوب
ونفس الاهداف
ونفس النفسيه الغير سويه
في التعامل مع الكائن الغريب اللي اسمه (الاقباط)
انا اشك ان فيه حاجه غلط ومش مظبوطه بتحصل
لكــــــــــــــــــــن ........
ابواب الجحيم لــــــــــن تقوي عليها
كنيستنا القبطيه وايماننا بالهنا اقـــــوي من اي دبابات او رصاص او تفجيرات
في وسط الحاجات الكتيره اللي بنشوفها وبنسمعها الفتره اللي فاتت ظهرت مطالب من مثقفين وشباب سواء مسلمين او اقباط بالغاء الماده التانيه من الدستور لتحقيق العداله والمساواه بين كافه المصريين وبصراحه استغربت جدا من تعليقات المتشددين والرافضين تماما لالغاء هذه الماده ومنهم اللي قال اياكم وشرع الله ومنهم اللي اتهم المطالبين بالغاء الماده بانهم بيسعوا لإثاره الفتنه ومنهم اللي وصل لابعد من كده وقال انها هاتبقي بحور دم وانها هاتكون ثوره للدفاع عن الدين مش الوطن وفي تعليق ضحكني موت لان صاحبه جهبذ وبيقول عاوزينها مدنيه علشان بناتنا المسلمات يتجوزوا شباب نصراني ويهودي وتبقي ع البحري ؟ طبعا واضح ان الاخ تعبان في مخه والموضوع ملتبس عليه وكمان منهم اللي قال الشريعه هاتتنفذ غصب عن عين اي حد واللي مش عاجبه يشوف له بلد تانيه وطبعا ده علي الاقباط اللي هو احنا وكلهم نسيوا اننا مسلمين ومسيحيين و بهائيين وشيعه وملحدين او لا دينيين مصريين ومفيش حد مننا يزيد سنتيمتر في الحقوق عن التاني طبقا للماده الاولي من الدستور واللي بتقول ان جمهوريه مصر العربيه دوله نظامها ديموقراطي يقوم علي اساس المواطنه . وكمان عندنا ماده مهمه جدا في الدستور وهي الماده 40واللي نصها بيقول ان جميع المواطنيين سواء امام القانون وكلهم متساوون في الحقوق والواجبات العامه لا تمييز بينهم في ذلك بسبب الجنس او الاصل او اللغه او الـديـن او العقيده ولكن ده بيتناقض تماما مع مضمون الماده التانيه من الدستور اللي حشرها الرئيس السادات لاغراض شخصيه بحته ليكتسب رضاء الجماعات المتشدده في الوقت ده ويحارب بيهم الشيوعيين والاقباط وكلنا عارفين لو كنت عاوز تمرر اي حاجه حطها في غلاف ديني علشان تديلها قدسيه عند الناس ومن ساعتها والناس بتتعامل علي ان الماده دي آيه قرآنيه يستحيل الغاءها او تعديلها وطبعا ده اسمه تعنت وعنصريه لانها مجرد ماده موضوعه من بشر ومفيش ما يمنع من تعديلها او الغاءها بغض النظر عن محتواها يبقي ليه الحساسيه الزياده في مناقشتها بدون تعصب ؟ تعالوا نتكلم بهدوء ونشوف ايه ايجابيات الماده التانيه وايه سلبياتها الايجابــيات =======: مش شايفه ليها اي ايجابيات ....ليه بقي؟ اقول لانها موضوعه بقالها اربعين سنه ومش شوفنا لها اي ايجابيات في تغيير حياه المصريين للاحسن و كلنا متابع تدهور الاخلاق وانتشار الفساد واحداث العنف والقتل والبلطجه والاضطهاد باسم الدين يبقي وجودها لم يؤثر بالايجاب في حياه الناس لان الحكايه مش في ماده تانيه ولا تالته لان الناس بالفعل معاهم شرع ربنا نفسه ومع ذلك عندنا الحرامي والقاتل والمغتصب والمنافق والمرتشي والجاسوس يبقي ما نتلزقش في الماده التانيه وان الغائها هاينشر الفساد والرزيله .... الخ لانهم منتشرين والحمد لله । نيجي للسلبيــات : ========= هاتكلم عن رايي كمصريه قبطيه ومعاناتي مع وجود مثل هذه الماده في دستور بلدي اولا : علي مدار اربعين سنه هي عمر هذه الماده لم نسمع عن حكم باعدام مسلم قتل قبطي او اي حكم عادل واخر حاجه براءه مجرمين نجع حمادي انهارده وهاتقولولي ما الكموني اخد اعدام هاقولكم اه هو اخد اعدام ولكن مش لانه قتل نص دسته نصاري وخلي اتناشر شاب من ذوي العاهات المستديمه ولكن لانه قتل ايمن المسلم واللي جه قدامه بالغلط ودي كارثه وسقطه ولكننا اتعودنا نشوفها طالما المجني عليه نصراني كافر ثانيا: المهزله بقي اننا نسمع قاضي محترم بيقول لشابه ارتدت عن الاسلام انا لو معايا سكين كنت قتلتك !! يانهار اسود كنت قتلتها ليه ياعم وتقتلها بصفتك ايه هو انت ربنا هنا ومين اللي ادالك الحق تقولها كده ماهو ربنا خلقنا احرار اللي عاوز يبقي مسلم اهلا وسهلا واللي عاوز يبقي مسيحي برضه اهلا وسهلا واللي مش عاوز الديانتين برضه هو حر في اختياراته اللي هايحاسبه عليها ربه لما يموت ومش من حق اي انسان انه يسلبه حريته في اختياره لمعتقده مهما كان ॥ ده رايي انا الشخصي وربنا شاهد عليا وانا ضد اجبار او ترغيب اي شخص في البقاء او اعتناق اي دين لان الدين علاقه خاصه جدا بين الانسان وربه ونرجع تاني للقاضي المحترم واسال هو قال لها كده بناءاً علي اي اساس هل اعتمد في كلامه علي مرجعيته الدينيه وتناسي انه فيه مواثيق حقوق انسان بتقول ان لكل انسان حريه الفكر والتعبير والاعتقاد وان عندنا من مواد الدستور ما يؤكد عدم التمييز بين الاشخاص علي اساس الدين والاعتقاد واللغه ووو ؟ يبقي نقدر نقول ان هذا القاضي استغل مرجعيته الدينيه في ارهاب البنت دي والحجر علي حريتها في اختيار معتقدها ثالثا : لما أعكس الصوره واشوف ان اي بنت عاوزه تغيير ديانتها من المسيحيه للاسلام بتلاقي كل الدعم والترحيب من اجهزه الدوله بأكملها وبيتم تغيير بيانتها في ساعتين ومقابله تعنت وارهاب واهدار دم وملاحقات امنيه للطرف المقابل انا مش ضد ان اي انسان يغير ديانته ومع ان كل انسان حر لان الله مش محتاج لنا بل احنا اللي دايما في احتياج له ولكن انا ضد الازدواجيه في المعايير ونفسي الاقي حريه حقيقيه لاي انسان سواء مسلم او مسيحي او يهودي او ملحد في اختياراته ويكون تفكيرنا أسمي من كده فا المسيحي اللي ها يأسلم مش هاينقص المسيحيين والمسلم اللي هايغير دينه لاي دين تاني برضه مش هاينقص المسلمين ونقيس علي كده جميع الاديان رابعا : اكيد اغلبنا تابع قضيه التوأمين ماريو واندرو ومعاناتهم بسبب تحول والدهم من المسيحيه الي الاسلام ( له كامل الحريه اكيد) وهانقول انه شخص بالغ ومسئول وله الحريه في اختيار عقيدته ॥لكن يعني ايه تغيير ديانه الاولاد بالعافيه لمجرد ان ابوهم غير ديانته ؟ طيب ما الاولاد قالوا انهم متمسكين بديانتهم المسيحيه يبقي ليه التعنت ده دا غير ان القاضي المتعصب رفض حضانه الام القبطيه للاولاد بسبب انها غير مسلمه وبالتالي هاتكون غير امينه علي تربيه الاولاد يعني علشان الست مسيحيه تبقي فاجره ولا ايه؟ ثم القاضي بيقول ان الاولاد لازم يتبعوا لدين والدهم لانه الدين الاعلي !!! هو فيه دين اعلي ودين اوطي ؟ ده ازدراء علني ماهو كده عيب واهو برضه تمييز علي اساس الدين يبقي فين المساواه بين المصريين ؟ يبقي نرجع لنفس النقطه تاني وهي ان القاضي ده برضه استخدم مرجعيته الدينيه في ازدراء السيده المسيحيه ام اندرو وماريو !! خامسا: وهو الموضوع الخاص ببناء الكنائس والافلام اللي بنسمع عنها ونشوفها فا فيه طلبات بناء كنايس بتاخد تراخيص بعد ३० سنه مثلا يعني بعد ما بيكون اللي قدم الطلب مات وشبع موت وحتي لو بعد الشر حصل وفيه كنيسه بدأت تتبني بنلاقي في ناس واخدين علي مسئوليتهم الاعتراض لمجرد ان المبني ده كنيسه وفي اعتقادهم انها من بيوت الكفر وواجب محاربتها والجهاد ضدها وشوفنا حوداث من النوع ده كتير كل ما نسمع ان فيه كنيسه هاتتبني نلاقي المتشددين رايحين جايين يقوموا في الناس البسطاء الحقوا كنيسه هاتتبني مصر دوله اسلاميه ما ينفعش يتبني فيها كنايس وده ضد هويه الدوله الاسلاميه وكلام كتير من ده لكن فجأه حصل تحول كبير في التعامل مع بناء الكنيسه واتحول الامر من تعنت في اعطاء التراخيص واثاره البسطاء الي تصدي الامن نفسه للاقباط في كنيسه العمرانيه وتحويل المنطقه لثكنه عسكريه بحجه ان الكنيسه بدون ترخيص او بها مخالفات هندسيه ... الخ وكأن التصدي لبناء كنيسه اصبح قضيه امن قومي يحشد له مئات العساكر والضباط بجد حاجه تفضح وتعر لما نتكلم عن ان الكنيسه بتتبني بدون ترخيص وما سألناش نفسنا ليه هي ليه من غير ترخيص مش لان فيه تعنت وتعصب وشبه استحاله لاخذ موافقه علي بناء الكنائس في مصر؟ وهل المحافظ اللي بيتفالح علي الكنيسه مش عارف يشوف غير مخالفه الكنيسه في محافظته ؟ده علي اساس ان كل العشوائيات الموجوده في مصر هبطت علينا من المريخ فجاه ولا نسي سيادته ان في محافظته وفي نفس الشارع بتاع الكنيسه اغلب ان لم يكن كل المباني بدون تراخيص ومخالفه للمواصفات؟ يبقي برضه نرجع ونقول ان المحافظ ومعاه الموظفين المسئولين عن اعطاء التراخيص وحتي الامن تعامل مع الكنيسه والشباب القبطي بعنف واضح وصريح لانهم وحسب مرجعيتهم الدينيه هما في حاله جهاد . خامسا: وسادسا: وسابعا: الي ما لانهايه يوصلني اني اقول اننا في أمس الحاجه لدستور مدنـــــي لا يفرق بين المواطنيين فعليا علي اساس الدين او المعتقد او اللغه او الاصل او اللون والكلام ان الغاء هذه الماده هو اساءه للدين الاسلامي ده كلام مش صحيح فا نحن نحترم كل الاديان واخواتنا المسلمين قبل اي شيء هما مصريين ولهم كل التقدير والاحترام ولا خلاف علي ذلك ولكن انا كمصريه قبطيه شايفه ان في تطبيق الماده التانيه ظلم لغير المسلم وانتقاص من حقوقه اللي بتكفلها له كل معاهدات حقوق الانسان ... ومن ابسط حقوقي كمصري ان اعامل بنفس الاسلوب والطريقه اللي بيعامل بها اخي واختي المسلمين داخل مصر اريد حريه في بناء كنائس وعدم التحريض علي كا قبطي وعدم المساس والازدراء بمعتقدي وان اتمكن من اعتلاء مناصب سياديه في الدوله لاني من ابناء هذه البلد ولي نفس الحقوق وعلي نفس الواجبات ولازم نفهم ان الدوله هي شخص اعتباري لا ياكل ولا يشرب ولا يعتقد اديان بعينها ... فمصر دوله بها اكثريه عدديه تدين بالاسلام ولكن ده لا يعني ان ننسي ان بها ملايين من الاقباط والبهائيين والشيعه واللادينيين لهم نفس الحقوق طالما ان عليهم نفس الواجبات ... نريدها دوله مصـــريه مدنيه ديموقراطيه حره متقدمه لا تنتمي الينا ولكن نحن من ينتمي اليها ويبقي شعارنا دائما ............ الدين لله والوطـــــــــن لنا جميعا ........... اعتذر للجميع عن إطالتي وأتمني ان نتناقش ونتحاور بهدوء وموضوعيه بناءه بدون تشنج او تحزب .
