كفايه حـــــــــــــــــــرام العالم كله واقف يتفرج عليها ...علي مصر
العالم كله عاوز يقطع فيـها ...في مصـر
لو انتوا فعلا مصريين بجد ارحموها
كلنا ضد الفساد
كلنا ضد الخراب
كلنا ضد الفوضي
عاوزين توصلوا البلد لحد فين تاني؟
ربنا يهديكم علي مصر وعلينا وعلي نفسكم
سامحيني يا بلدي ما بيدي حيله
قلبي واجعني عليكي يا امـــــــي
يارب احمي بلادي مصــــــــــــــــــــــــــــــــــر
هناك 23 تعليقًا:
انتى ازاى تتجرأى وتقولى كفاية يا عميلة يا خاينة دفع لك كام مبارك علشان تقولى كدا
استعدى للشتيمة يا قمر
انا رأيى من رأيك ..
Desert cat
اتجرأت وقولت كده لما لقيت ان بلدي بتتحرق وبتولع وفي ناس كل همهم يحققوا مكاسب شخصيه من اللي بيحصل ولما شوفت الراجل بتاع ايران بيتدخل بطريقه مستفزه علشان يولع بلدي ولما سمعت ان اسرائيل جايه علي اخر الزمن وتقول انها عاوزه تساعد مصر في الازمه دي يا حلاوه اهو ده اللي كان ناقصنا .ولما شوفت ان قناه الجزيره الملعونه كاتبه في موقعها علي الانترنت "معا لاسقاط مصر" ولما شوفت تصريحات اوباما وغيره المستفزه وكان مصر دي بتاعتهم واحنا اللي اغراب فيها كل ده يخليني مش اقول كفايه وبس
ده عاملي حاله من الرعب والخوف علي بلدي
شباب 25 يناير ابطال لانهم حققوا حاجات ماكناش نحلم بيها طول عمرنا ولكن في مقابل ده عندنا خساير كبيره جدا انا بحبهم ومعاهم ولكن في ناس عاوزين يسرقوا مجهودهم ويستغلوه لمصالحهم الشخصيه في ناس حاولوا يشوهوا ثورتهم علشان يقلبوا الشعب عليهم هابقي كدابه لو قلت ان كل اللي في التحرير دلوقتي مش بيحب مصر لا في ناس كتير بيحبوها سواء في التحرير او في البيوت ولكن اذا كنا بنقول ان مبارك خربها في التلاتين سنه اللي فاتت فاحنا عاوزين نحافظ عليها لان مبارك هايمشي ولا هايتحرق واحنا اللي هانفضل فيها دي بلدنا احنا مش بلد حد تاني ولازم نحافظ عليها في ناس جعانه كتير يا حنان بقالهم 12 يوم من غير اكل ولا شرب لازم نحس بيهم والا هانلاقيهم طلعوا علينا دبحونا علشان رغيف العيش والحكايه تتحول لثوره جياع .كل اللي انا عاوزه اقوله اننا بلاش نصلب رأينا لو ممكن الامور تتحل بطريقه هاديه ومافيهاش خساره كبيره لمصر.لاننا لو وقعنا ماحدش من اللي شايفينهم دلوقتي هايسأل فينا.
انا رايي اننا زي ما بنطالب برحيل مبارك دلوقتي نطالبه بانه يرجع لنا فلوسنا اللي نهبها من دم الشعب المقهور هو واولاده وشويه الحراميه اللي حواليه قبل مايمشي .يطالبوا بسرعه محاكمه العادلي محاكمه عسكريه بسبب كل الجرايم اللي اتعملت في الشباب وفي الاقباط تحديدا لانه سفـــــاح ومجرم دي حاجات لا تقل اهميه من رحيل اللامبارك.
انا بحب مصر قوي مصر بالنسبه لي النفس اللي بتنفسه ده كلام حقيقي من قلبي انا مابعرفش اقول حاجه مش حاساها. انا لما بسمع نشيد بلادي جسمي بيقشر
مصري دي حاجه كبيره قوي وجميله بس للي يعرف قيمتها ويحبها .
نورتي يا قمر
غير معرف
اهلا بيك في اي وقت نورت او نورتي مدونتي
تحياتي لك وللجميع
يارب احميها بجد
موافقاكى فى كل كلمة طبعا يا بونيتا
وللاسف كلام قطة صح
هههههههه بيتقال على اى حد يقول كفاية انه عميل للنظام الفاسد
مع اننا اكتر ناس اتأذت
ربنا يرحمنا
فينوسه
احنا ولا بيهمنا من حد واللي عاوز يقول يقول
في ناس عندنا غريبه جدا لما كان بيحصل حاجه للنصاري كانوا تلقائيا ومن غير ما يشعروا يقولوا لك ماهو اكيد الاقباط غلطانيين ماهو اصلهم هما اللي بيستفزوا مشاعر (المختلين عقليا) اصل هما اللي بدأوا واعتدوا علي الامن(المسكين ) ولما كان اي قبطي من داخل او خارج مصر يتكلم ويقول ان مصر فيها ظلم وفي تواطؤ من الامن الناس كلهم ومن غير تفكير يقولوا لا مفيش الكلام ده دا مصر زي الفل والامن ميه ميه وكله تمام واللي بيتكلم وبيحاول يطالب بحقوقه ده خاين وعميل للصهاينه وعاوز يعمل فتنه طائفيه !!! ولما كان بيتم تفجير كنيسه ونقول يا عالم كان فين الامن وقتها يقولولك دي اسرائيل والشماعه اللي انتي عارفاها .دلوقتي لقيناهم كلهم بيتكلموا نفس الكلام اللي كنا بنقوله بقالنا سنين واللي بيخالفهم بيبقي هو اللي خاين وعميل !! مش قادره افهم الناس ولا البلد
طيب ماهي البلد دي اللي يوم ما طلع المتظاهرين يطالبوا باسقاط النظام وضربوا صوره الرئيس بالجــــزم قتلتهم و هي هي نفس البلد اللي قامت بحمايه المتظاهرين في الاسكندريه علشان يسبوا البابا وضربوا صورته بالجزم المعفنه بتاعتهم موقفهم غريب برضه فين حريه الرأي اللي اديتوها لللارهابيين علشان يسبوا في البابا ومنعتوها من المتظاهرين لانهم بيطالبوا بحقوقهم؟
ثم اشمعني دلوقتي افتكروا يعاقبوا العادلي ماحنا بقالنا 11 سنه بنطالب الرئيس بإقالته بسبب حوادث القتل العمد ضد الاقباط في عهده بدايه بالكشح ونهايه بالقديسين وقطار سمالوط ؟ كان فين الناس اللي بيطالبوا بمحاكمته دلوقتي؟ للاسف المجرمين اللي اتمسكوا وبيحققوا معاهم كانت جرائمهم واضحه وصريحه ولكن لان كل واحد في البلد كان بيقول وانا مالي وصل بينا الحال للكارثه اللي احنا فيها
اللي كانوا مع النظام امبارح انهارده اتقلبوا ضده واللي كانوا ضده امبارح انهارده معاه وحاجات غريبه وناس متناقضه ولخبطه وانا عن نفسي بقيت بشك في نفسي ومتلخبطه ومش عارفه ايه اخره اللي احنا فيه ده؟.
نورتيني يا فينوس معلش وجعتلك دماغك
صباحكم خير وطيبة
مدونة جميلة ورائعة
د.ريان
صباحك سكر يا دكتور
نوت المدونه بوجودك الاول واتمني الا يكون الاخير
تحياتي لك
Boneta
والله ليكى وحشه كبييييييييره قوى
سامحينى على طولت غبتى
أصل المفاجئه كانت صادمه لينا كلنا
انه يجى اليوم اللى نقول لاء
كفايه ظلم
كفايه قهر
كفايه قمع
كفايه فقر
بس مفيش حلاوه من غير نار
ثم نالحريه غالى قووووووى
ضهداء دفعو دمهم غالى فداء ترابك يامصر
بس ياخساره
دخلو البلطجيه والحرميه وبوظو كل شئ حلو
بس الازمه دى بينت الرجاله من العيال
مين الشريف ومين الحرامى
مين النظيف ومين اللى لا مؤاخذه وسخ
تخيلى ناس كتير بيقولو حرام زعلنين عليه يمشى بيقول مبارك برضو
بس احنا صحيح غلطنين والله
طيب نصبر عليه لحد مايكمل 100 مليار من دمنا وعرقنا وحقنا
ده ياعينى غلبان يدوبك 70 باين ولا 80 مليار مش عرفين
اخخخخ ياناس
ربنا يسترها ويتممها على خير يارب
بس ياترى هيجى يوم والاقى حفيدى ( تخيل طبعا قال حفيد قال ) جاى يسألنى ويقولى ياجدى أحكيلى عن ثوره 25 يناير 2011
لحسن ده عندى فى كتاب التاريخ فى المدرسه
وكمان مطلوب منى فى موضوع تعبير
ياسلالالالالالام
والله ده انا هقوله قواله
بس ربنا يارب يتممها على خير الاول
اطلعك بقى من الجو ده
وأقولك اخر رساله جاتنى بمناسبه الاحداث الجاريه يمكن تضحكك شويه
أفلام جيل الثوره 2011
أبى فوق الدبابه
عوده النت
المسدس والاجنده
الرصاصه المطاطيه لاتزال فى جيبى
فى بيتنا بلطجيه
كيف تصرف العفريت
جاءنا الرئيس التالى
نحنو لا نرمى المولوتوف
مهمه فى ميدان التحرير
الريس عمر سليمان
حراميه فى لندن
البحث عن دستور
وأخيرآ.....
ليله القبض على عز
اتمنى ليكى مشاهده مضحكه
تقبلى تحياتى لارق قلب
محمـــد التركـــى
ازيك يا بو حميد انت فين يا عم
الحمد لله أنك بخير
اه شوفت اللي حصل الواحد مش مصدق لدلوقتي في حاجات بشوف انها حلم جميل واتحقق وحاجات لما بفتكرها زي الخراب والدمار بقول يارب ما تسمح ابدا انها تحصل تاني في مصر
وعلي رايك مفيش حريه من غير نار
سيبك انت احلي فيلم هو ليله القبض علي عـــز
ابن الحراميه هههههههههههه
دول طلعوا كلهم حراميه يا محمد
الشباب مش لاقي ياكل وقاعد يتجوز علي نفسه والكلاب قاعدين يمصوا دم الشعب
سمعت اخر حاجه
مبارك يريد تغيير الشعب ههههه
نورتني يا محمد
تحياتي لك
وجعتى دماغى ايه بس يا بونى
ده انتى قولتى كلام فى الجووون
بس مين يفهم بقى ؟
بصي يا بنوتة
انا متفق معاكي ومختلف
متفق معاكي ان التخريب والفوضي محدش عارف نتيجتها ايه
كلنا عايزين الخير للبلد علشان كلنا بنحبها ودي مفيش حد يختلف عليها خالص
يمكن الناس في الاول كانت تقول كفاية كده والمطالب اتحققت
بس ملفات الفساد اللي بتتفتح كل يوم
المليارات اللي الناس بتسمعها كل يوم
بتغظيها وتثبتها علي الارض اكتر
مع اني مش عارف اي ثبات
يعني لو حصل واتنحي الرئيس مفيش خطة واضحة
كلام حسام
منور يا استاذ حسام سواء كنت متفقا او مختلفا ولو ان حضرتك ذكرت نقاط الاتفاق ولم تذكر نقاط الاختلاف حتي نتناقش فيها
علي كل انا معاك في ان ظهور ملفات فساد لاعضاء الحزن الوطني و وزراء حكومته الغير نظيفه كان له تأثير كبير في زياده حاله السخط عند المصريين بدون استثناء .
ولكن زي ما حضرتك ذكرت انه لا توجد خطه واضحه عند الشباب الموجود الان في التحرير غير مطالبتهم الرئيس بالرحيل او التنحي (الان) وانا كما ذكرت ضـــــد النظام واتمني رحيله امس قبل غدا ولكن من متابعتي لمحللين سياسيين لجزئيه التنحي فهمت انه لو لم يتم تداول منظم وسلمي للسلطه هايكون الوضع كارثي وهاتنتشر الفوضي وده الشيء الوحيد اللي كلنا كمصريين بنرفضه خوفا علي مصر من ان تتحول لعراق ثانيه .وبخلاف ذلك فكلنا متفقين علي فساد الحكومه وطغيانها متمثله في راس الدوله وانا اتمني ان يتم محاسبه كل من تسبب في خراب ودمار مصر ليس فقط علي مدار الاسبوعين الماضيين بل وعلي مدار ال 30 عام السابقه.
تحياتي لك
دلوقتى الناس مش اتفرجت عليها بس دلوقتى فى اللى بيستعد علشان ينهش فيها ويقطع منها واللى شمتان واللى طاير من الفرحة
لكن العيب مش عليهم العيب على اللى نزل بمطالب محددة رجع تانى بيها وزيادة عليها المحاكمات العسكرية والسجون الحربية الف مبروك بقى وربنا يسترها عليكى يا مصر
الف مليون مبروك لكلمة الحق
التي ولدت من دماء الشهداء وعبرت الشارع
وعلمت العالم العربي كيف يكون اقوى الابطال
هو مواطن بسيط من الشعب
وهو درس اكبر للبقية الذين يؤمنون
ان الكرسي اكبر من إرادة الشعب
عمار يابلد العزة والكرامة
ومنكم نتعلم معاني الحرية
د.ريان
الله يبارك فيك
نحن السابقون وانتم اللاحقون
اتمني ان يكون ماحدث هو خطوه اولي في الطريق الصحيح لدوله الديموقراطيه واحترام حريه الانسان وتحقيق العداله الاجتماعيه بين جميع المواطنيين.
اشكرك علي المرور وتقبل تحياتي
Desert cat
تعالي نكون متفائلين يا حنان ونقول انها بدايه كويسه وخصوصا بعد بيان رقم 3و4 للقوات المسلحه
اتفائلى انتى
مش عندى استعداد اتفائل على خراب وطنى
سلام
Desert cat
بقي كده بتبيعيني يا نونو
طيب يا ستي مش هاتفائل خلينا نتقهر م التشاؤم ):
الإنسان العادل صاحب العقل الحر يقول عن الحق إنه حق ولو كان صادراً من عدوه ويقول عن الباطل إنه باطل ولو كان صادراً من أبيه أو أخيه.
رؤوف
amiralcafe
منور يا استاذ رؤوف و بشكرك علي تعقيبك الرائع وانا متفقه معاك تماما في كل كلامك
تحياتي لحضرتك
أزايك يابونى
كل عيد حب وانتى طيبه
واحلى عيد حب ممزوج بالحريه والنصر
انا جاى اطمن عليكى واعرف اخبارك ايه
مستنى الجديد يابونه مش متعود منك على طولت الغيبه
يارب تكونى بخير
ابقى طمنينى عليكى
تقبلى تحياتى لشخصك الذى احبه
محمـــد التركـــى
محمد التركى
ازيك يا ابو حميد
عامل ايه؟
انا بخير اشكر ربنا
مش لاقيه جديد بصراحه او فيه ومش عارفه ابدأ ازاي
اشكرك علي اهتمامك وسؤالك عني
كتر الف خيرك
عيد حب سعيد عليك وعلي كل المصريين الطيبين
تحياتي لك
إرسال تعليق