انا واخويا علي ابن عمي ....وانا وابن عمي ع الغريب
بصراحه المثل ده افتكرته اليومين دول لما سمعت باخبار حرق وهدم كنيسه اطفيح
وعلي حسب روايات كهنه الكنيسه وبعض شهود العيان من القريه في وسائل الاعلام فهمت ان في علاقه ما كانت بين راجل مسيحي متجوز وسيده مسلمه متجوزه برضه وان الخبر انتشر في القريه فا طبيعي الناس ثاروا من الموضوع ده والعلاقه الغير سليمه دي وتم عمل قعده عرفيه جمعت مابين كبار المشايخ في البلد وكبار العائلات المسيحيه للوصول الي حل للمصيبه دي وتم اتخاذ قرار جماعي برحيل الشخص(( المسيحي )) ده من القريه باكملها لانه شخص غير مرغوب في وجوده سواء علي المستوي القبطي او المسلم طبيعي شخص زي كده لازم يكون منبوذ من كل الاطراف .
نيجي بقي للسيده(( المسلمه)) اللي هي الطرف التاني في القصه دي
يقـال ان حصل خلاف داخل اسرتها بسبب ان ابن عم والدها عاوز يقتلها كنوع من غسل العار وبين والدها اللي حاول تهريبها خوفا عليها من القتل . اذن يا جماعه الخلاف هنا بين شخص وابن عمه علي قتل بنتهم بغض النظر عن سبب القتل ايه .
لكن للاسف تطور الخلاف بينهم الي تبادل اطلاق للنار ترتب عليه مقتل والد السيده علي يد ابن عمه ومقتل ابن العم علي يد والد السيده واصابه شخص تاني من نفس العائله برصاص في رجله يعني من الاخر خلاف عائلي بين اتنين ادي الي قتلهم لبعض .
اللي حصل بعد كده انه تم دفن القتيلين والتوجه مباشره للكنيسه الموجوده داخل المنطقه لحرقها وتكسيرها وهدمها !!
وانا بجد مش فاهمه ايه دخل الكنيسه في الفيلم الهابط ده من الاساس ؟
واحد و واحده غير محترمين ايا كانت ديانتهم هما الاتنين ايه دخل دور العباده في قصتهم ؟
هل لو الراجل والست دول من نفس الديانه كان الاهالي راحوا حرقوا المسجد وهدموه وداسوا الكتب الاسلاميه فيه برجليهم؟
اكيد الاجابه هي لا واستحاله ده يحصل ... ليه؟
لان بالعقل كده وببساطه المسجد ايه دخله بانحراف سلوك بعض الاشخاص المسلمين .
يبقي نفس الفكره لو طبقناها علي الكنيسه .
الكنيسه ايه دخلها بانحراف سلوك اي شخص مسيحي؟
الكنيسه مكان للعباده والارشاد الروحي لاي انسان يطلب ارشادها ومساعدتها لا هي جهه رقابيه علي تصرفات المسيحيين ولا غيرهم .
يبقي ليه الربط بين اللي حصل وبين ان رد الشرف اللي سال لازم يكون من الكنيسه ومن مسيحيين ابرياء لا ليهم في الطور ولا الطحين ؟ مع التنبيه ان دي مش حاله اغتصاب دي علاقه بالتراضي بين الاتنين ان صحت القصه ..
مش هانبطل هبل بقي ونحترم نفسنا شويه؟ امتي هانتعلم نحــترم قدسيه اماكن العبـاده بتاعه غيرنا؟
لحد امتي هاتفضل الكنيسه والاقباط يدفعوا تمن اخطاء هما مش طرف فيها ؟
هو غسل العار يبقي بحرق الكنايس؟ علي اساس ايه بيعملوا كده؟
هي الكنيسه قالتلها تروح للراجل وتحبه ومش تراعي الدين والعرف والعادات والتقاليد بتاعه بلدها ؟؟ ولا الكنيسه قالت للمحترم التاني يروح يمشي معاها؟؟
ثم الادهي من كل ده الجيش الهمام اللي الاقباط استنجدوا بيه لما اتكرم عليهم وجه بعد خراب مالطا قاعد ياكل بسكويت ويشرب حاجه ساقعه ويتفرج علي الكنيسه وهي بتتهدم وتتحرق وعلي البيوت وهي بتتنهب وعلي نساء وبنات الاقباط والارهابيين بيتحرشوا بيهم داخل بيوتهم !!
والحجه ايه المره دي ؟؟ قال ايه يا حلويييين؟؟؟؟؟؟؟؟؟
مش عنده اوامر باطلاق الرصاص والتعامل مع المدنيين .
يا سلام ع الحنيه ..يا سلام ع الانسانيه
يلا مش عايزه اتهور واقول كلام يضايق الناس لكن عايزه اسال سؤال بسيط للجيش :
وهل وقت ما روحتوا علي الدير وضربتوا الرهبان العزل واستخدمتوا الرصاص الحي في التعامل معاهم (بسبب حته سور اهبل) مع انهم لا مجرمين ولا حراميه ولا حرقوا دار عباده ولا روعوا ناس آمنه جوه بيوتهم زي اللي حصل في قريه صول باطفيح .
هل وقتها كان عندكم اوامــــــــــــــــر بالتعامل مع الرهبان بالرصاص الحي؟اتفرجوا علي محتوي الفيديو ده وياريت ياريت حد يفسرلي ايه اللي بيحصل بالظبط و هل اللي بيحصل من الغوغاء دول في الكنيسه شيء يرضي ربنا؟
هل سمعنا ان في ناس كفره بلا دين بيعملوا كده في اماكن عباده خاصه بمسلمين او مسيحيين او يهود ؟
لأني بجد .. تعبت م التفكير والتحليل والكلام
لكن فيه حاجه اخيره عايزه اقولها ...
اللي بيحصل ده ..عار علي كل مصري محترم وصاحب ضمير..
هناك 5 تعليقات:
اللي بيحصل ده ..عار علي كل مصري محترم وصاحب ضمير
اخدت جملتك يا بونى ومش هزود عليها
عاااااااااااار
انا ساكتة ومكتبتش عن الموضوع ومستنية اشوف السيناريو المعتاد
لا انا بقي مش قادره اسكت
ومش مفروض اننا نسكت بعد كده لان السكوت والادب بيتفهم غلط مع البلطجيه والرعاع امثال اللي في الفيديو دول .
ثم هما شويه المختلين نفسويا دول متخيلين ان صعب علي اي مسيحي يمسك سلاح ويشغل فيهم الضرب ؟ يبقوا هبل لا مؤاخذه لان مفيش فرق بين المسلم والمسيحي في الطباع كمصريين
لكن فيه فرق عند المسيحي لان تعاليم دينه هي اللي بتحجم من انفعالاته وبتحثه بل وبتأمره علي عدم رد الاذي بالاذي او كراهيه حتي اشد الاعداء.
وببساطه شديده لو المسيحي حب ياخد حقه بايده ويركن تعاليم دينه علي جنب شويه هايعملها اخر ما يزهق من قله الحياء بتاعه الناس دي .
لانه واضح جدا ان الهمج والارهابيين اللي اتجرأوا علي كنيستنا مش عاوزين غير كده و محتاجين حد يعرفهم مقامهم كويس علشان يتلموا ويعرفوا هما مين وبيعملوا ايه.
اومال لو ماكانوش مفضوحين كانوا عملوا ايه اكتر من كده؟
سيبك انتي هانقعد ونشوف ايد ربنا بتتمد علي كل واحد فيهم زي ماشوفناها اتمدت علي كل كلب اشترك ودبر في قتل اخواتنا قبل كده .
ربنا موجود ومستنيين قصاصه العادل والعاجــــل
اتعلمي تبصي للجانب المشرق
الناس اللي اتروعت حقها مش هايضيع وكويس ان الخساير جات في المباني.
اهل الست (الامؤاخذه) عملوا واجب كبير اولاً قتلوا بعض وخلصوا البشريه من مخلوقات دمويه زيهم
ثانياً قاموا مشكورين بحرق الكنيسة وهدمها وبكدة ساعدونا اننا نبني واحدة تانيه اجدد منها طبعاً لان فكرة البني او التجديد كانت هتاخدها بتاع 20 سنه على الاقل علشان ناخد تصريح. على فكرة انا خدمت وهناك وشوفتها ولعلمك الكنيسه ديه لو جم شويه هواء شداد كانوا طربقوها على بعضها
ثالثاً وده الاهم الناس دلوقتي كلها مع بعضها ايد واحدة وابتدا الكل يعرف من اللي بيغلط ومين اللي بيعتدي
Love
MishMish
Migo Mishmish
انا مش شايفه اي جانب مشرق يا مشمش للاسف وخصوصا ان حاليا بيتم التفاوض مع الكهنه انهم ياخدوا ارض تانيه غير ارض الكنيسه خارج القريه علشان يبنوا فيها كنيسه وده اسمه استهبال يعني ايه الكلام ده ؟ دي بلطجه وبلطجه ممنهجه من الدوله كمان يعني ايه شويه همج وارهابيين يدخلوا يحرقوا كنيستي ويدنسوها وكمان يفرضوا إرهابهم علي المسيحيين ويتشرطوا علينا؟ هو لو اللي اتحرق واتهدم ده مسجد كان حصل للمسيحيين ايه؟ والله كانوا عملولنا اباده جماعيه بس الحمد لله احنا مش عندنا ارهابيين بالمنظر ده .
وعلي فكره انا سمعت كاهن الكنيسه وهو بيقول ان الكنيسه دي اتبنت من 11 سنه وعلي دم احد الشهداء اللي قتلوه الارهابيين بسبب بناءه للكنيسه.
ثم حتي ولو اتفقنا ان الكنيسه حالتها مش كويسه فا ده مش معناه انهم يتبرعوا ويحرقوها ويصلوا فيها كمان .
فيه حاجه جميله اسمها احترام عقيده الاخر ومقدساته واماكن عبادته .
اعتقد قدامنا مئات السنين علي ما نتطور ونبقي بني ادمين بحقيقي ونعرف يعني ايه كلمه احـــــترام الاخر أيـا كان الاخر وديانته ومعتقده مخالف لـي.
نورتي يا مشمش وشكرا علي المرور الجميل .
تحياتي
الأخت العزيزة والغاليه / بونى
معاكى حق فى كل اللى بتقوليه ... وقلة أدب ملهاش حدود ... كل سنة أحنا بنشوف القصص دى مرة مسيحى ومسلمة ومرة مسلم ومسيحية ... أيه دخل دور العباده فى الموضوع ؟!
فى الديانتين اللى عملوا كده منحرفين عن الدين ... والدين عندهم فى البطاقة وبس ... زى شوية المجانين اللى رايحين يهدموا الكنيسه ... دول برضه ولا يعرفوا أى حاجه عن دينهم ... والغلط فى كده لو رجعنا للوراء شوية ح تلاقيه نابع أساسا من المنظومة التعليمية والإعلامية الغلط ... ودا يا ستى ثمار التعاون مع الأفكار الخارجية على مدار ال 30 سنه اللى فاتت عشان لو تلاحظى الكلام عن الفتن الطائفية قبل الفتره دى كانت معدومه.
الناس لازم تتغير عن طريق وضع قوانين وأستراتيجيات جديده بحيث يكون فيه عقاب صارم ويكونوا عبرة لغيرهم ... مش عاجبك يا سيدى شوفلك بلد تانية روح عيش فيها .
كمان لازم منظومة التعليم من ناحية الدين تتغير ونرجع الدين ماده إلزامية والمناهج تكون فى إطارها الصحيح.
وأخيرا أرجع وأقولك أحنا بنحبكم ... و ح نفضل نحبكم رغم أنف الحاقدين ... وزى ما كنا بنصلى فى حمايتكم ... لازم شيخ الأزهر ولا المفتى يعتذر لأن الكنائس دى فى حماية الوطن اللى إحنا عايشين عليه وبنحبه وفديناه بدمائنا كثير ومستعدين نضحى بنفسنا عشانة .
سامحينى على الإطالة ... وتقبلى مرورى وإشتراكى وصداقتى ودمتى بكل الود.
أخوك / تامر
إرسال تعليق